Մեր տարածաշրջանում բացվել է տևական խաղաղության, կայունության և բարգավաճման պատմական հնարավորությունների պատուհան. ես հավատում եմ, որ Հայաստանը կգործի երկարաժամկետ ռազմավարական ընկալմամբ. այս մասին, ադրբեջանական լրատվամիջոցների փոխանցմամբ, ասել է Թուրքիայի ԱԳ նախարար Հաքան Ֆիդանը: «Կարևոր ենք համարում վարչապետ Փաշինյանի դրական ուղերձներն այս ուղղությամբ։ Նա դիրքորոշում է հայտնում խաղաղության օգտին և նպաստում այս գործընթացում դրական առաջընթացին», — ասել է թուրք պաշտոնյան։ Թուրք-ադրբեջանական տանդեմը զբաղված է Փաշինյանի փիառով։ Եթե թշնամի Թուրքիայի ԱԳ նախարարը, ով նախկինում եղել է հատուկ ծառայությունների ղեկավար գովում է Փաշինյանին, ուրեմն ՀՀ իշխանությունները սպասարկում են թուրքական օրակարգ և հայակործան ծրագիր են կյանքի կոչում։ Հակառակ պարագայում Թուրքիայի պես երկրի քաղաքական ղեկավարներից մեկը չէր զբաղվի Փաշինյանի փիառով՝նրա քայլերը գնահատելով, որպես դրական։ Թուրքիայի և Ադրբեջանի համար Փաշինյանն ու ՔՊ-ն՝Ալլահի պարգևն են, քանի որ առանց ՔՊ-ի վրա հենվելու Բաքուն երբեք չէր օկուպացնի Արցախը, չէր գրավի ՀՀ-ից սուվերեն տարածքներ և Եռաբլուրի տարածքը չէր եռապատկի։ ՔՊ-ականներն իշխանության են բերվել դրսի ուժերի միջոցով՝թուրքական, ադրբեջանական և հակառուսական օրակարգ սպասարկելու համար։ Փաշինյանը հրաժարվում է Հայոց ցեղասպանությունից, Արևմտյան Հայաստանից, Արարատ սարից՝դա բխում է Թուրքիայի երկարաժամկետ պանթուրքական և հայակործան ծրագրերից։ Ինչ վերաբերում է Ադրբեջանին, ապա Բաքուն ՔՊ-ի միջոցով կարողացավ հայաթափել Արցախը, այս պահին էլ պատրաստվում է օկուպացնել Սյունիքը։ Քանի դեռ ՀՀ քաղաքացիները քաղաքականապես պասիվ են և դիտում են Փաշինյանի և կնոջ ընտանեկան շոուները՝հայոց պետականությունը կործանվում է, իսկ Ալիևը տարածքային հավակնություններ ունի արդեն ողջ Հայաստանի նկատմամբ։ Միակ ելքը՝փաշինյանական կլանի արագ հեռացումն է՝համազգային պայքարով՝լայն քաղաքական կոնսոլիդացիայի միջոցով։
Անդրանիկ Պետրոսյան
