«Դանին ծնվեց ու մեր բոլորի կյանքը լույսով լցրեց: Ես չէի էլ կարող պատկերացնել, թե մայրությունը ինչ հրաշք երևույթ է: Ես ունեմ փոքր հրաշք ու դա ամենաերջանիկն է ինձ դարձնում»,- Tert.am Life-ի հետ զրույցում՝ խոսելով մայրության ու ծնողավարման իր կանոնների մասին, ասաց դերասանուհի Էվելինա Շահիրյանը:
«Առաջին օրերին նայում էի Դանիին ու հավատս չէր գալիս, որ ինքն իմն է: Անընդհատ նրան գրկում էի ու լացում:
Մինչև Դանիի ծնվելը մտածում էի ոնց եմ այդքանը հասցնելու, և՛ իրեն խնամել, և՛ տնային գործերն անել, և՛ աշխատել : Բայց ամեն ինչ հասցնում ես ցանկության դեպքում: Մամաս ինձ շատ է օգնում բոլոր կենցաղային հարցերում»,- մեզ հետ զրույցում պատմեց դերասանուհին:
Նա խոստովանեց, որ հղիության ընթացքում մտածում էր, որ մի քանի ամսից կդիմի դայակի օգնությանը, բայց հիմա չի պատկերացնում ու չի ուզում այդ մասին մտածել:
«Շատ դժվարությամբ կվստահեմ Դանիի խնամքը այլ մարդու:
Օգնողներն ու աջակցողներն իսկապես շատ -շատ են իմ շրջապատում ու անչափ շնորհակալ եմ բոլորին դրա համար:
Առաջին հերթին, իհարկե մայրս է, որ պատրաստակամ ամեն հարցում արագ օգնում է: Առանց նրա չգիտեմ, թե ինչ էի անելու:
Մայրիկիս ու Դանիի կապը շատ ուրիշ է, երկուսն էլ իրար համար խելագարվում են: Նրանից բացի բոլոր հարցերում ինձ շատ է օգնում տեգորս կինը, նրան էլ հանգիստ վստահել եմ ու էլի կվստահեմ Դանիին: Ամենակարևորն այն է, որ տղամարդուկս մեծանում է իրեն շատ սիրող մարդկանցով:
Հարազատներիս, ընկերուհիներիս համար ես արդեն երկրորդ պլան եմ մղվել: Նրանց Դանին է առաջնահերթ հետաքրքրում»,- անկեղծացավ Էվելինան:
Նա նշեց, որ ամուսինը՝ ռեժիսոր Հովհաննես Ղազարյանը, երեխայի խնամքի հարցում անսահման շատ է օգնում:
«Եվ՛ հոգեպես, և՛ ֆիզիկապես իր աջակցությունն անսահման շատ է եղել: Ես վստահ եմ, եթե ինքը չլիներ, ես ուժեղ դեպրեսիաներ կունենայի:
Անքուն գիշերների ժամանակ եղել է, որ Դանիին վերցրել, դուռը վրաս փակել ու հրամայել է, որ քնեմ: Դանիով իմ ու Հովոյի կապը շատ ավելի ամուր դարձավ ու ես համոզվեցի, որ ունեմ աշխարհի ամենալավ, ամենաուշադիր ու հոգատար ամուսինը»,- պատմեց մեր զրուցակիցը:
Դերասանուհի Էվելինա Շահիրյանը նշեց, որ թատրոնում այս պահին զբաղվածությունն այդքան էլ շատ չէ ու մայրիկի օգնությամբ հասցնում է:
«Շուտով սկսվելու են նոր ներկայացման փորձերը ու ավելի դժվար ընթացք կսկսվի, բայց մենք դա էլ կհաղթահարենք»,- վստահեցրեց Էվելինան: Նա հավելեց, որ մի քանի օրից կսկսվեն նոր սերիալի նկարահանումները: «Մանրամասները կիմանաք շուտով, միայն կասեմ, որ նմանատիպ կերպարով հանդես չեմ եկել ու անհամբեր սպասում եմ մեկնարկին»,- ամփոփեց նա:
