Սիրիայի իշխանությունները խզել են ռուսական ընկերության հետ «Տարտուս» ծովային նավահանգիստը կառավարելու մասին պայմանագիրը, որը կնքվել էր 2019թ.: Այս մասին, kommersant.ru-ի փոխանցմամբ, Al Watan թերթին տված հարցազրույցում հայտարարել է Տարտուս նահանգի մաքսային վարչության տնօրեն Ռիադ Ջուդին։
«Չեղարկվել է ռուսական ընկերության հետ «Տարտուս» նավահանգստում ներդրումների մասին պայմանագիրը։ Նավահանգստի գործունեությունից ստացված ամբողջ եկամուտը կօգտագործվի սիրիական պետության շահերից ելնելով»,- ասել է Ջուդին։
Ռուսական «Ստրոյտրանսգազ» ընկերության հետ ներդրումային պայմանագիրը կնքվել է 2019 թվականին՝ 49 տարի ժամկետով։ Ըստ Սիրիայի տրանսպորտի նախկին նախարար Ալի Համուդի՝ փաստաթուղթը նախատեսում էր ռուսական կողմից ավելի քան 500 մլն դոլարով նավահանգստի կառավարում և ներդրումներ դրա արդիականացման համար։
«Տարտուս»-ը Սիրիայի երկրորդ ամենամեծ նավահանգիստն է, որտեղ ռուսական նավատորմի նյութատեխնիկական ապահովման կետ կա: Դեկտեմբերի 12-ին փոխարտգործնախարար Միխայիլ Բոգդանովը հայտարարել է, որ Ռուսաստանը ակնկալում է Սիրիայում իր ռազմակայանները պահպանել նոր իշխանությունների գալուց հետո։
