«Մեր հայ դերասանուհիների մասին չեմ ուզում խոսել, բայց անդրադառնամ ժամանակին ինձ համար շատ սիրելի երգչուհու և դերասանուհու՝ Քրիստինա Օրբակայտեին. այն ժամանակ, երբ նա մի փոքր ավելի արտահայտիչ քիթ ուներ, շատ ավելի հիշվող, կերպարային և հետաքրքիր էր:
Երբ նա վիրահատեց քիթը, կարծես տաղանդը կորավ, դարձավ անդեմ:
Ինձ համար ցավալի թեմա է պլաստիկ վիրահատությունների տենդենցը և կարծում եմ, որ երիտասարդներն այսօր ավելի շատ հոգեբանի կարիք ունեն»,- Tert.am Life-ի հետ զրույցում՝ խոսելով պլաստիկ միջամտությունների և նույն դիմագծերով աղջիկնեի մասին, ասաց ռեժիսոր Սուրեն Շահվերդյանը:
Նա նշեց, որ իր համար նաև անհեթեթ է այսօրվա համատարած, արաբական ոճի դիմահարդարումը։
«Մեր հայ աղջիկներն այսօր արաբական ոճի դիմահարդարմամբ ավելի շատ իրենց տգեղացնում են՝ դարձնելով ինչ-որ արաբական կերպար:
Իմ արվեստանոցում ուսանողներս մատնահարդարումից սկսած մինչև շրթներկ և այլն, քննարկում են ինձ հետ, և փառք Աստծո, որ ազդեցություն ունենում եմ և ակնհայտ տեսնում եմ փոփոխություն։
Որքան համեստ ու պարզ լինեն, որքան չերևա, որ պլաստիկ միջամտություն է արված, այդքան գեղեցիկ է և ավելի հետաքրքիր»,- նշեց մեր զրուցակիցը:
Սուրեն Շահվերդյանն անկեղծացավ, որ իր համար բնականը շատ ավելի գնահատելի և գեղեցիկ է։
«Նույնիսկ թատրոնում դերասանուհիներին խնդրում եմ, որ մինիմալ դիմահարդարմամբ դուրս գան բեմ, որքան որ հնարավոր է, եթե դերը չի պահանջում»:
Սուրեն Շահվերդյանը նշեց, որ իր համար որպես ռեժիսոր առաջին հերթին կարևոր են դերասանի էներգետիկան և պրոֆեսիոնալ կարողությունները:
«Երբեմն առաջին հայացքից թվում է, թե գեղեցիկ է, ամեն ինչ համահունչ է, բայց, եթե խարիզմա չկա, չի կարողանում գրավել ոչ ոքի։
Բայց կան շատ անսովոր արտաքին ունեցող մարդիկ, որոնք այնպիսի խարիզմա ունեն, որ միանգամից քեզ «վերցնում» են:
Երիտասարդ աղջիկներին խորհուրդս հետևյալն է՝ ներքին գեղեցկությունը թող կարևորեն, հետո նոր արտաքին:
Փայլն ու գեղեցկությունը անցնում են երրորդական պլան, եթե չկա բովանդակություն»,- ամփոփեց ռեժիսորը:
