Հայաստանի համար դժվար կլինի առանց ԵԱՏՄ-ի և ԱՊՀ-ի շրջանակներում համագործակցության, ՌԻԱ «Նովոստի»-ին ասել է ԱՊՀ գլխավոր քարտուղար Սերգեյ Լեբեդևը։
«Իրականությունը սա է. Հայաստանի համար դժվար կլինի առանց ԱՊՀ երկրների, առանց ԵԱՏՄ-ի, առանց ԱՊՀ-ի շրջանակում համագործակցության: Իսկ ինչի՞ համար են անհարկի բարդություններն ու դժվարությունները հայ ժողովրդի համար: ԱՊՀ երկրները և Բելառուսը, որքան գիտեմ, պատրաստ են օգնել Հայաստանին պահպանել այդ փոխգործակցությունը»,- նշել է Լեբեդևը։
Նա նաև հույս է հայտնել, որ Հայաստանը կվերադառնա ԱՊՀ շրջանակում լիարժեք համագործակցությանը։
Խոսելով Հայաստանի և ԱՄՆ-ի միջև ռազմավարական գործընկերության մասին վերջերս ստորագրված խարտիայի և Հայաստանի՝ ԵՄ-ին անդամակցելու Երևանի ծրագրերի մասին՝ ԱՊՀ գլխավոր քարտուղարը նշել է, որ բազմաթիվ փաստաթղթեր ստորագրվում են, բայց հետո կյանքի չեն կոչվում։
«Շատ փաստաթղթեր են ստորագրվում, բայց ոչ բոլորն են իրականացվում, կյանքն իր շտկումներն է անում»,- ասել է Լեբեդևը։
