Գնդապետ Դավիթ Վանեսյանը երեք պատերազմների մասնակից էր, ամբողջ կյանքում ծառայել է հայրենիքին, սահմանի մասին մի վատ լուր լսելիս անմիջապես շտապում էր շփման գիծ։ Այս մասին Newday.am-ի հետ զրույցում ասաց նրա կինը` Նազիկ Վանեսյանը։
Տիկին Նազիկի խոսքով՝ ամուսինը մասնակցել է երեք արցախյան պատերազմներին։
«Թեև ոստիկանությանում էր, բայց ամբողջ կյանքում իրեն պահեց որպես մարտիկ, երկրի տարածքային ամբողջականությունն իր համար առաջնային էր։ Ինքը այդպես մեծացրեց նաև տղայիս. տղաս ևս իր օրինակին էր հետևել ու հետևում է։ 44 օրյա պատերազմին երկուսն էլ մասնակցել էին։»,- նշեց մեր զրուցակիցը։
Նա պատմեց, որ Դավիթ Վանեսյանը 44 օրյա պատերազմում ունեցած կորուստներից հետո ուշքի չէր գալիս։
«Չէր հետևում անգամ իր առողջությանը։ Բանակի օրը ուզում եմ` իրեն և իր նման մարդկանց ևս հիշեն, շատերի մասին խոսում են, իսկ շատերը մոռացվում։ Նա հայրենիքը վտանգված տեսնելուց շատ էր ընկճվել, հետո կայծակնային քաղցկեղը խլեց նրա կյանքը։ Ես ուզում եմ ասել, որ ամուսինս իր կյանքի մեծ մասը նվիրեց ծառայությանը։ Այսօր նաև իմ ամուսնու համար թանկ բանակի օրն է։ Բանակը պետք բոլորով հզորացնենք, ոչ թե թիրախ դարձնենք»։
