Բանակցություններ են ընթանում, և մենք փորձելու ենք այսօր գործընթացը դնել իրավական հիմքերի վրա: Այս մասին Tert.am-ի հետ զրույցում ասաց ՀՀ Լեռնագործների, մետալուրգների և ոսկերիչների արհեստակցական կազմակերպությունների ճյուղային հանրապետական միության նախագահ Էդուարդ Փահլևանյանը՝ անդրադառնալով Զանգեզուրի պղնձամոլիբդենային կոմբինատի աշխատակիցների գործադուլին:
«ժողովրդի, աշխատողների ցասումը դնելու ենք իրավական հիմքերի վրա: Ավելի շուտ փորձելու ենք դնել, որ այդ պահանջն ըստ աշխատանքային օրենսգրքի լինի: Ժամը 17:00-ին դա ներկայացվելու է տնօրինությանը: Եթե մենք եկանք հանգուցալուծման, և դա բավարարի բոլոր աշխատողներին, աշխատանքները սկսելու ենք: Այսօրվա ընթացքում պարզ կլինի ամեն բան»,- ասաց Փահլևանյանը:
Նա ընդգծեց, որ Արհմիությունը հիմա ձեռնարկել է քյալեր, որ ամեն բան արվի իրավական հիքմերի շրջանակներում, որ կարողանան աշխատողների շահերն առաջ մղել և պաշտպանել:
Հարցին՝ ըստ նրա՝ խախտվա՞ծ են աշխատողների իրավունքները, քանի որ Կոմբինատը հակառակն է պնդում, նա արձագանքեց. «Դեռ հունվարի 31-ին աշխատողների այս բողոքը սկսելուց առաջ արհմիությունները բանակցում էին, որ աշխատավարձերի բարձրացում լինի, բայց ոչ բավարար էր, մեծամասնությունը իրազեկված չէր այդ բանակցությունների մասին, ուստի այս պարագայում մենք համամիտ ենք աշխատողների հետ, որ դա լինի ավելի կտրուկ, բայց օրենքի սահմաններում: Մենք հիմա ամեն ինչ ձեռնարկում ենք, որ դա օրենքի սահամնենրում, ըստ աշխատանքային օրենսգքրի տեղի ունենա»:
Հարցին էլ՝ կոմպրոմիսների կգնա՞ ԶՊՄԿ-ն, քանի որ նրանց հայտարարությունները մեկը մյուսից կտրուկ էին, Փահլևանյանը նշեց, որ իրենք արդեն առաջարկն արել են:
«Հիմա, ըստ օրենսգրքի, բոլոր աշխատողների 1/3-ը պետք է փակ քվեարկությամբ համաձայնություն տա, որ մենք հնարավորություն ունենանք համաձայանագիր կնքենք այսօրվա ընթացքում, որ օրենքով սահմանված կարգով 14 օր ժամանակ տանք, որի ընթացքում պետք է հանձնաժողով ստեղծենք և լուծենք մեր աշխատողների պահանջները, եթե դրանք բավարարվեն, աշխատողները դուրս կգան աշխատանքի»,- պարզաբանեց նա:
Փահլևանյանի խոսքով՝ հունվարի 31-ին 200-250 հոգի էին բողոքի ակցիա անում: «Հիմա Կոմբինատի աշխատանքները դադարեցված են, ոչ օրինական ձևաչափով աշխատողները կանգնեցրել են, ես սա մեղադրանքի համար չեմ ասում, զուտ ասում եմ օրենքի տառով, ուստի մենք հիմա փորձում ենք այնպես անել, որ դա օրինականցնենք, ամբողջ բողոքը լինի ըստ աշխատանքային օրենսգրքի: Ժամը 5-ին գրավոր տեսքով ներկայացվելու է և բոլոր ստորագրություններով, որ կամ մենք համաձայնության ենք գալիս ու համաձայնագիր ենք կնքում, կամ էլ մենք չենք դադարեցնում աշխատողների բողոքի ձայնը, ցասումը: Մենք ձգտում ենք տանել օրենքի դաշտ, որ գործատուն հնարավորություն չունենա օրենքով սահմանված կարգով սանկցիաներ ու պատժամիջոցներ կիրառի աշխատակիցների հանդեպ ու նաև պարապուրդի ուղարկի»,- ասաց նա:
Հիշեցնենք, որ հունվարի 31-ից ԶՊՄԿ-ի աշխատակիցները գործադուլ են անում՝ պահանջելով աշխատավարձի բարձրացում, նրանք նույնիսկ դրսում են գիշերել:
ԶՊՄԿ-ն հաղորդագրություն էր տարածել` տեղի ունեցողը որակելով անօրինական և նշել, որ եթե վերոնշյալ անօրինական գործողությունները շարունակվեն, ընկերությունը ստիպված կլինի իր աշխատակիցների զգալի թվին ուղարկել հարկադիր պարապուրդի:
Նշենք, նաև, որ ԶՊՄԿ-ն ՀՀ թիվ մեկ հարկատու ընկերությունն է: ՀՀ վարչապետ Նիկոլ Փաշինյանը, օրերս հրավիրած ասուլիսին՝ անդրադառնալով ԶՄՊԿ-ի գործունեությանը, նշեց, որ առաջին անգամ ՀՀ պետական բյուջեն Զանգեզուրի պղնձամոլիբդենային կոմբինատից 33 մլրդ դրամի շահաբաժին է ստացել։
«Մենք 2021 թվականին և այս պահի դրությամբ՝ ՀՀ Կառավարությունը, այսինքն` ժողովուրդը, Զանգեզուրի պղնձամոլիբդենային կոմբինատի սեփականատերն է, այդ բաժնեմասը արժե մի քանի տասնյակ միլիարդ դրամ, սա փաստ է: Այս տարի ԶՊՄԿ-ն ոչ միայն ՀՀ ամենամեծ հարկատուն է՝ 94 մլրդ հարկի ձևով, այլև առաջին անգամ ՀՀ պետական բյուջեն շահաբաժին է ստացել որպես սեփականատեր 33 մլրդ դրամի»,- ասաց նա:
