ԼՂ-ից բռնի տեղահանված ընտանիքների բնակարանային ապահովման պետական աջակցության ծրագրի շրջանակում 2025 թվականի փետրվարի 18-ի դրությամբ տրվել է 652 հավաստագիր. տրամադրված հավաստագրերից արդեն իսկ իրացվել է 12 հավաստագիր:
Այս մասին Tert.am-ի գրավոր հարցմանն ի պատասխան տեղեկացրել են աշխատանքի և սոցիալական հարցերի նախարարությունից:
Նշենք, որ 2024 թվականի հունիսի 15-ից մեկնարկել է Արցախից բռնի տեղահանվածներին բնակարաններով ապահովելու ծրագիրը:
Նշենք նաև, որ ծրագրի շրջանակում դիմում կարող են ներկայացնել 2020 թ․ սեպտեմբերի 27-ից հետո ԼՂ-ից բռնի տեղահանված այն ընտանիքները, որոնք համապատասխանում են միջոցառման առաջին փուլի պայմաններին։ Դրանք են՝ 3 և ավելի անչափահաս երեխա ունեցող ընտանիքները, զոհվածի, կերակրողին կորցրածի կամ 1-ին կամ 2-րդ խմբի հաշմանդամություն ունեցող անդամով ընտանիքները, գործող հիփոթեքային վարկ ունեցող ընտանիքները, նաև ցանկացած այլ կազմով ընտանիքները, որոնք կհամարվեն վարկունակ և բանկից կստանան աջակցության առնվազն 50%-ի չափով լրացուցիչ վարկ։
Tert.am-ը գրավոր հարցմամբ խնդրել էր նախարարությունից տեղեկացնել, թե Արցախից բռնի տեղահանված քանի՞ ընտանիք է այս պահի դրությամբ դիմել ծրագրով բնակարան ստանալու համար: Հիմնականում որտե՞ղ են նախընտրում բնակարան կամ տուն ձեռք բերել նրանք:
Եվ այսպես, նախարարությունից տեղեկացրել են, որ ԼՂ-ից բռնի տեղահանված ընտանիքների բնակարանային ապահովման պետական աջակցության ծրագրի շրջանակում 2025 թվականի փետրվարի 18-ի դրությամբ տրվել է 652 հավաստագիր. Տրամադրված հավաստագրերից արդեն իսկ իրացվել է 12 հավաստագիր, որոնցից հինգը գույքը ձեռք են բերել Երևանում, երկուսը՝ Կոտայքում (Աբովյան), մեկը՝ Արարտում (Նոր Խարբերդ), երկուսը՝ Սյունիքում (Սիսիան), մեկը՝ Գեղարքունիքում (Գավառ), մեկը՝ Վայոց Ձորում (Ազատեկ):
Աջակցության չափերը սահմանված են ՀՀ կառավարության 2024 թվականի մայիսի 16-ի թիվ 710-Լ որոշմամբ: Նախատեսված է ընտանիքի յուրաքանչյուր անդամի համար տրամադրել 5 մլն, 4 մլն, 3 մլն դրամ, որն ուղղվում է հիփոթեքային վարկի մնացորդային մայր գումարի մարմանը:
Նախարարությունից Tert.am-ին նաև տեղեկացրել են, որ հավաստագրի տրամադրման պահին քաղաքացին չի նշում, թե որ բնակավայրերով է հետաքրքրված, հետևաբար այդ մասին նախարարությունը տեղեկատվություն ստանում է հավաստագրի իրացումից հետո:
Tert.am-ը խնդրել էր նախարարությունից հայտնել, թե 2 մլն դրամ աջակցությունը, որ դեպքերին է վերաբերվում և քանի՞ ընտանիք է այդ ծրագրով դիմել:
Հարցին ի պատասխան նախարարությունը տեղեկացրել է, որ 2 մլն դրամ աջակցությունը վերաբերում է 2024 թվականի մայիսի 16-ի դրությամբ գործող հիփոթեքային վարկ ունեցող ընտանիքներին, այս պահին աջակցություն ստացել է 13 ընտանիք, որոնց վճարվել է շուրջ 60 մլն դրամ:
Նշենք, որ բնակարանային ապահովման աջակցության ծրագրի համար կարող են դիմել բռնի տեղահանված այն արցախցիները, որոնք ստացել են ՀՀ քաղաքացիություն:
ՆԳՆ-ից Tert.am-ին տեղեկացրեցին, որ ՀՀ քաղաքացիություն ստանալու դիմում է ներկայացրել Արցախից բռնի տեղահանված 7, 721 անձ:
