Սպիտակ տունը մերժել է Եվրախորհրդարանի ֆրանսիացի պատգամավոր Ռաֆայել Գլյուքսմանի՝ Ազատության արձանը Ֆրանսիային վերադարձնելու կոչը։ Իր նախաձեռնությունը ֆրանսիացի քաղաքական գործիչը բացատրել է նրանով, որ Միացյալ Նահանգները հեռացել է ժողովրդավարությունից և կանգնած է «բռնակալների կողքին»։
Ինչպես նշում է nypost.com-ը, Սպիտակ տան մամուլի քարտուղար Քերոլայն Լևիտը ճեպազրույցի ժամանակ հարցին, թե արդյոք ԱՄՆ նախագահ Դոնալդ Թրամփը կվերադարձնի արձանը Ֆրանսիային, պատասխանել է. «Միանգամայն ո՛չ: Եվ իմ խորհուրդն է այս անանուն ֆրանսիացի ցածր մակարդակի քաղաքական գործչին՝ հիշեցրեք նրանց, որ միայն Ամերիկայի Միացյալ Նահանգների շնորհիվ է, որ ֆրանսիացիներն այժմ չեն խոսում գերմաներեն»:
Երեկ եվրոպատգամավոր Ռաֆայել Գլուքսմանը, որն Ուկրաինայի հավատարիմ պաշտպանն է և խստորեն քննադատել է նախագահ Դոնալդ Թրամփի՝ պատերազմի վերաբերյալ ԱՄՆ քաղաքականության արմատական փոփոխությունը, ասել էր, որ Ֆրանսիան պետք է հետ վերցնի հանրահայտ Ազատության արձանը, քանի որ ԱՄՆ-ն այլևս չի ներկայացնում այն արժեքները, որոնք Ֆրանսիային խրախուսել էին նվիրել արձանը:
«Մենք պատրաստվում ենք բռնակալների կողմն ընտրած ամերիկացիներին ասել.«Մե՛զ վերադարձրեք Ազատության արձանը: Մենք այն ձեզ ենք նվիրել, բայց, ըստ երևույթին, դուք արհամարհում եք այն: Այսպիսով, այստեղ՝ տանը, դրա համար լավ կլինի»», — ասել է ձախ կենտրոնամետ քաղաքական գործիչն իր Place Publique ձախ կենտրոնամետ շարժման համագումարում:
Ազատության արձանը բացվել է Նյու Յորքի նավահանգստում 1886 թվականի հոկտեմբերի 28-ին՝ Ամերիկայի Անկախության հռչակագրի հարյուրամյակի կապակցությամբ՝ որպես ֆրանսիացի ժողովրդի նվեր Ամերիկային: Այն նախագծել է ֆրանսիացի Օգյուստ Բարտոլդին։
