Ստամբուլում մինչև մարտի 23-ն արգելվել են հանրահավաքներն ու ցույցերը՝ ընդդիմադիր քաղաքապետ Էքրեմ Իմամօղլուի ձերբակալության պատճառով, հայտնում է TGRT Haber հեռուստաալիքը՝ հղում անելով քաղաքի նահանգապետին։
«Շտապ նորություն. մարտի 19-ից 23-ը Ստամբուլում արգելված են բոլոր տեսակի հանդիպումները, ցույցերը և հանրահավաքները», — հաղորդել է հեռուստաալիքը։
Հայտնի է նաև, որ Ստամբուլի համալսարանի ուսանողները ևս բողոքել են Իմամօղլուի ձերբակալման դեմ: Ոստիկանությունը սկսել է ցրել ցուցարարներին։
Բացի այդ, Իզմիրում հազարավոր թուրքեր հավաքվել են Ժողովրդահանրապետական կուսակցության շենքի մոտ՝ ի պաշտպանություն Իմամօղլուի։
Քաղաքապետի ձերբակալությունը բացասական է ազդել Թուրքիայի ֆոնդային շուկայի ր ազգային արժույթի վրա: Ստամբուլի ֆոնդային բորսայում BIST 100 ինդեքսն առուվաճառքի բացման ժամանակ նվազել է 6,87%-ով՝ հասնելով 10060 կետի։ Ահա թե ինչպես է շուկան արձագանքել Ստամբուլի ընդդիմադիր քաղաքապետ, երկրի նախագահի գլխավոր մրցակից Էքրեմ Իմամօղլուի ձերբակալման մասին լուրերին։
Սկզբում բորսայի ղեկավարությունը կասեցրել է բոլոր տեսակի առուվաճառքը, իսկ դրա վերսկսումից հետո ինդեքսը 4,6%-ով ցածր է եղել երեքշաբթի՝ մարտի 18-ի առևտրային նստաշրջանի փակման մակարդակից։
Ֆոնդային շուկայի հետ մեկտեղ անկում է գրանցել նաև թուրքական լիրան։ Դրա փոխարժեքը դոլարի նկատմամբ նվազել է 5%-ով։ 10-ամյա պետական պարտատոմսերի եկամտաբերությունը նվազել է 175 բազիսային կետով՝ հասնելով 29,94%-ի։
Հիշեցնենք, որ Ստամբուլում իրավապահները լայնածավալ գործողություն են սկսել, ընդդիմադիր քաղաքապետ Էքրեմ Իմամօղլուին ձերբակալելու օրդեր Է տրվել։
«Ստամբուլի մայրաքաղաքի քաղաքապետարանում լայնածավալ կոռուպցիոն գործողություն է սկսվել։
Գործողության շրջանակում քաղաքապետ Էքրեմ Իմամօղլուի և մամուլի հետ կապերի գծով նրա խորհրդական Մուրադ Օնգունի ձերբակալության օրդեր է տրվել»,- ասվում է հրապարակման մեջ։
Ստամբուլի համալսարանը երկուշաբթի որոշում է կայացրել չեղյալ համարել Իմամօղլուի դիպլոմը երկրի գլխավոր դատախազության համապատասխան հարցումից հետո, ինչը խոչընդոտում է նրա առաջադրումը երկրի նախագահի պաշտոնում:
