Oragir.News-ի տեղեկությունների համաձայն՝ Սյունիքի մարզի Կապան համայնքի Ներքին Հանդ բնակավայրի օկուպացված հատվածում ադրբեջանական կողմը կոտրել է Հայրենական պատերազմին նվիրված հուշարձանը։
Թեմայի վերաբերյալ Oragir.News-ը զրուցեց Ներքին Հանդ բնակավայրի վարչական ղեկավարի՝ Խաչատուր Բարսեղյանի, հետ։ Վերջինս հստակ չկարողացավ օր նշել, թե որ ժամանակահատվածից ի վեր հուշարձանը չի երեևում։
«Այդ հուշարձանը նվիրված էր Հայրենական պատերազմի զոհերի հիշատակին։ Կոնկրետ օր չգիտենք, թե երբվանից այն չկա, բայց արդեն 20 օրից ավելի է՝ ինչ չենք տեսնում։ Ճիշտ է՝ հեռավորությունը քիչ չէ, բայց հուշարձանի տեղն այնպիսին էր, որ անզեն աչքով երևում էր, դիմացը ոչ թե զորանոց, այլ հենակետ են կառուցել»,- ասաց նա։
Խաչատուր Բարսեղյանի խոսքով՝ որոշ գյուղացիների կարծիքով՝ արձանը չի երևում, որովհետև նշյալ հենակետը փակել է տեսադաշտը, բայց դրանք միայն ենթադրություններ են, քանի որ փաստն այն է, որ հուշարձանը այլևս տեսանելի չէ։ Ինչ վերաբերվում է գյուղում տիրող իրավիճակին՝ վարչական ղեկավարը նշեց, որ որևէ լուրջ միջադեպեր տեղի չեն ունեցել, կրակոցներ, դիվերսիոն գործողություններ ևս չեն նկատվել։
Հարկ է նշել, որ սա Ադրբեջանի կողմից ոչմիայն հերթական վանդալիզմի դրսևորումն է, նաև անարգանք իր պատմության նկատմամբ, քանի որ ադրբեջանցի ժողովուրդը նույնպես Հայրենական պատերազմի մասնակից է։ Այսպիսով՝ Ադրբեջանը ոչ միայն չի դադարում անիրատեսական նախապայմաններ առաջ քաշել խաղաղության պայմանագրի ստորագրման համար, այլև զուգահեռաբար՝ շարունակում է մշակութային ցեղասպանությունը, ոչնչացնելով հայկական ժառանգությունը։
