Մեծամասնության արկածախնդրությունը շարունակվում է: Այս մասին խորհրդարանում Եվրոպական Միության անդամակցության գործընթացի սկզբի մասին օրենքի նախագծի երկրորդ ընթերցմամբ քննարկման ժամանակ ասաց «Հայաստան» խմբակցության քարտուղար Արծվիկ Մինասյանը:
Պատգամավորը նշեց, որ իրենց դիրքորոշումը ոչ միայն մնացել է անփոփոխ, այլ ավելի է ամրապնդվել իրենց խոսքերի ճշմարտացիությունը։ «Հայաստան և ԵՄ հարաբերությունները պետք է ունենան բնականոն զարգացման ընթացք, ինչի հիմքը CEPA համաձայնագիրն է և այս ուղղությամբ Հայաստանի իշխանություններն ուղղակի անգործության են մատնված, ամենապարզ օրինակը վիզաների ազատականացման շրջանակներում է: Ոչ մի նորմալ գործողություն չեն ձեռնարկում այս ուղղությամբ, էլ չասած՝ հսկայական ճանապարհային քարտեզը, որ կա ու այս ուղղությամբ բան չեն անում»,- ասաց նա:
Ըստ պատգամավորի՝ նման աշխարհաքաղաքական զարգացումների պայմաններում կտրուկ շրջադարձը, երբ երկրի քաղաքականությունը տեղափոխում է լրիվ ուրիշ հարթություն, որը լի է վտանգներով, շատ դաժան ու իմ խորին համոզմամբ նաև վտանգավոր դրսևորումներ ունի։
«Մյուս կարևոր դիտարկումն այն է, որ ՀՀ-ն ներկայումս շատ հեռու է Եվրոպական Միության անդամակցության նույնիսկ թեկնածուի կարգավիճակի համար պահանջվող Կոպենհագենյան չափանիշներից: Այս չափանիշներին մոտենալու համար մեծ քայլեր պետք է իրականացվեն, առաջին հերթին, ինչպես նշեցինք, հենց CEPA համաձայնագրի շրջանակներում, և այսօր ամպագոռգոռ հայտարարություններ անել և այն էլ բերել այսպիսի մի, ըստ էության, հայտարարություն, բայց ոչ օրենք և պարտադրել Հայաստանի պառլամենտին նման օրենքի ընդունումը, դա մերժելի է»,- ասաց նա:
Մինասյանը նշեց, որ Սահմանադրությունը հստակ պահանջ է սահմանում՝ անդամակցությունը հանրաքվեով պետք է իրականացվի, մնացած ամեն ինչը ձևական է, ավելին, բոլոր իրավասությունները, բացառիկ իրավասությունները Հայաստանի կառավարությանն են տրված այդ բանակցությունները վարելու և ոչինչ չի խանգարում այսօր նորմալ ընթացքով տանելու համար։
«Եվ վերջում, շատ կարևոր է անդրադառնալ նաև հենց իրավական ասպեկտին: Ես, իհարկե, սա օրենք չի, սա օրենքի որևէ չափանիշի չի բավարարում: Սա մի բաժակաճառ է հայտարարության տեսքով, որը բացարձակ կապ չունի օրենքի՝ որպես վարքագծի պարտադիր, համապարտադիր նորմ պարունակող և պետության հարկադրանքով գործող կամ ներդրվող գործողությունների հետ։ Դա օրենքի տրամաբանությունից դուրս է»,- ասաց նա:
Մինասյանը, ավարտելով խոսքը, ևս մեկ անգամ արձանագրեց, որ այստեղ էլ, ինչպես միշտ, կառավարության առաջարկները հետևողականորեն չտարվեցին առաջ, նույնիսկ երկրորդ ընթերցման ժամանակ կառավարությունը ներկայացրել է առաջարկություններ, որոնք նորից, թե առաջին, թե երկրորդ ընթերցման ոչ մի բանի տեղ չի անցել։
«Մեր խմբակցությունն, ինչպես որ հայտարարել ենք, զերծ մնալով նաև տարբեր տիպի ավել-պակաս զրույցներից՝ նորից հայտարարում ենք, մենք չենք մասնակցելու քվեարկությանը»,- ասաց նա:
