89 տարեկան հասակում մահացել է պերուացի հայտնի գրող, գրականության Նոբելյան մրցանակի դափնեկիր Մարիո Վարգաս Լյոսան: Այս մասին հայտնել է նրա որդին՝ Ալվարոն, փոխանցում է ՌԻԱ Նովոստին։
«Խոր ցավով տեղեկացնում ենք, որ մեր հայրը՝ Մարիո Վարգաս Լյոսան, մահացել է Լիմայում՝ իր ընտանիքի շրջապատում», — գրել Է նա X-ի իր էջում։
Պերուացի գրող Մարիո Վարգաս Լյոսան 2010 թվականին արժանացել է գրականության Նոբելյան մրցանակին: Շվեդական ակադեմիան հայտարարել էր, որ մրցանակը պերուացի գրողին է շնորհել «իշխանության կառուցվածքի մանրակրկիտ նկարագրության եւ անհատի դիմադրության, ընդվզման ու պարտության վառ պատկերների համար»:
Լյոսան իսպանախոս աշխարհի ամենահռչակավոր գրողներից է, ավելի քան երեք տասնյակ վեպերի, դրամաների եւ էսսեների հեղինակ: 1995 թվականին նրան շնորհվել է իսպանախոս աշխարհի ամենահեղինակավոր` Սերվանտեսի անվան մրցանակը:
Լյոսան լատինամերիկացի առաջին գրողն է, որ արժանացել է Նոբելյան մրցանակին 1982 թվականից ի վեր, երբ այն շնորհվել էր կոլումբիացի Գաբրիել Գարսիա Մարկեսին:
