Մենք գործ ունենք շարունակ կորուստներ ձեռք բերող մի իշխանության հետ, որ հերթական մոլորեցնող քայլերն է իրականացնում այս ամբիոնից, հրապարակային հայտարարելով, թե իբր ձեզ սպասում է պայծառ ապագա. այս իշխանության շարունակման պարագայում ոչ միայն ապագան պայծառ չի լինելու, վաղվա օրն է մթագնելու: Այս մասին ԱԺ ամբիոնից հայտարարեց «Հայաստան» խմբակցության քարտուղար Արծվիկ Մինասյանը:
«Ով ընդդիմանում է Նիկոլ Փաշինյանին կամ քրեական գործով է անցնում, կամ պատգամավորական անձեռնմխելիությունից է զրկվում, կամ եթե պատգամավոր չէ անպայման կողքերից 1-3 պոզ աճում է և մեղադրվում է այդ մարդը պոզավոր լինելու մեջ: Ուրիշ որևէ այլ բացատրություն չկա, կամ երբ տեսնում եք, որ որևէ այլ բացատրություն չկա, էլի հիշում եք նախկինների թալանը, բա ձեր թալանների մասին ո՞վ պետք է խոսի»,- հայտարարեց նա:
ԱԺ փոխնախագահ Ռուբեն Ռուբինյանի դիտարկմանը, թե ընդունո՞ւմ է, որ նախկինում թալան է եղել, Մինասյանն ասաց՝ իհարկե, եղել է, հիմա էլ է շարունակվում:
«Պարո՛ն Փաշինյան, ես Ձեզ ճանաչել եմ շատ վաղուց, գիտեմ, որ շատ հաճախ դուք քայլեր եք անում, հետո նոր եք հետ գալիս ու մտածում՝ պետք էր անել այդ քայլը, թե՝ ոչ: Մի անգամ խնդրանք ունեմ ձեզ, էս անգամ հելեք այս ամբիոնից ասեք՝ ժողովուրդ ես հեռանում եմ, գնացե՛ք ընտրեք ձեր ուզածներին, թող այդ մարդիկ գան, ձեզ ներկայացնեն այն բանաձևը, որը Հայաստանը այս վիճակից դուրս կբերի: Մի՛ համարեք, որ Դուք վերջին ճշմարտությունն եք: Դուք ոչ միայն վերջին ճշմարտությունը չեք, այլ նաև նախավերջինն էլ չեք Ձեր՝ այս իրականացրած գործողություններով»,- ասաց Մինասյանը:
