Ռուսաստանում ռազմական դատարանը գեներալ-լեյտենանտ Վադիմ Շամարինին, ով ավելի վաղ հեռացվել էր Զինված ուժերի գլխավոր շտաբի պետի տեղակալի պաշտոնից, կաշառակերության գործով 7 տարվա ազատազրկման է դատապարտել: Այս մասին հայտնում է ՏԱՍՍ լրատվական գործակալությունը՝ վկայակոչելով նրա փաստաբանին։
Նույն ժամանակահատվածով Շամարինին արգելել են գտնվել պետական ծառայության մեջ և նրան զրկել են նաև զինվորական կոչումից, ինչպես նաև առգրավել մոտ 36 մլն ռուբլի։
Նշվում է, որ մեղադրող կողմը պահանջել էր նրան դատապարտել 12 տարվա ազատազրկման։
Շամարինը կալանավորվել է 2024 թվականի մայիսին: Հարուցվել է քրեական գործ՝ պաշտպանության պետական պատվերը կատարելիս առանձնապես խոշոր չափերով կաշառք ստանալու հոդվածով: Քննիչների տվյալներով՝ 2016-2023 թվականներին նա Պերմի Telta Հեռախոսային գործարանի գործադիր տնօրեն Ալեքսեյ Վիսոկովից ստացել է 36 միլիոն ռուբլի՝ պաշտպանության նախարարության պետական պայմանագրերով ապրանքների մատակարարման ավելացման և ընդհանուր հովանավորչության դիմաց:
Գեներալը գործարք է կնքել հետաքննության հետ և մասամբ ընդունել իր մեղքը՝ նշելով, որ խոսքը 19 մլն ռուբլու մասին է։ Ավելի վաղ, մարտին Շամարինը խնդրել է իրեն ուղարկել ռազմական գործողության գոտի։
