Ռուսաստանում ակտիվ լրատվամիջոցների թիվը շարունակում է նվազել։ Անցած տարվա արդյունքներով փակվել է 2970 լրատվամիջոց, որից կեսից ավելին՝ տպագիր։ Այս մասին «Ինտերֆաքս» լրատվական գործակալության գլխավոր տնօրենի տեղակալ Յուրի Պոգորելին խոսել է «Կոմերսանտ» հրատարակչության կազմակերպած համաժողովում։
«Լրատվամիջոցների ռեալիզացման ֆիզիկական ենթակառուցվածքը շարունակում է նեղանալ: Տպագիր ԶԼՄ-ներն ահավոր ծանր վիճակում են թե՛ տարածման, թե՛ ֆիզիկական արտադրության առումով»,- նշել է Պոգորելին։
Նա հավելել է, որ նոր տպագիր մամուլի մեծ մասը ներկայացված է գիտական և թեմատիկ ամսագրերով, ինչպես նաև ժամանցային հրատարակություններով։ Նոր գրանցված առցանց լրատվամիջոցների թվում են պետական կառույցների կայքերը, որոնք երկար ժամանակ գործում են, սակայն այժմ ստացել են պաշտոնական կարգավիճակ։
Տպագրական արդյունաբերության ձեռնարկությունների միության տվյալներով՝ վերջին 20 տարիների ընթացքում Ռուսաստանում մամուլի տաղավարների թիվը չորս անգամ նվազել է։ Կրպակների թվի կրճատման վրա, մասնավորապես, ազդում է վարձակալության բարձրացումը։
