Հայաստանի ծանրամարտի հավաքականի անդամ, Եվրոպայի կրկնակի չեմպիոն Գարիկ Կարապետյանի կարծիքով` Եվրոպայի առաջնության այս ոսկե մեդալը քրտնաջան աշխատանքի արդյունք է:
«Նախորդ վնասվածքից հետո դժվարությունները շատ են եղել: Եվ ժամանակն էլ քիչ էր մարզումների համար` երկու հավաքի ենք մասնակցել, երկու ամիս ժամանակ կար մարզումների: Քրտնաջան մարզումների շնորհիվ հասել եմ իմ գերազանց մարզավիճակին, վերադարձել եմ ոսկե մեդալով», «Զվարթնոց» օդանավակայանում լրագրողների հետ զրույցում ասաց Կարապետյանը:
Անդրադառնալով Եվրոպայի առաջնության չեմպիոնական մոտեցման բուռն էմոցիաներին, ծանրորդը շեշտեց, որ ինքն այդքան զգացմունքային էր, քանի որ մի քանի մրցաշար շարունակ իրեն չի հաջողվել ոսկե մեդալակիր դառնալ:
Մոլդովայի մայրաքաղաք Քիշնևում կայացած Եվրոպայի առաջնության 109 կգ քաշային կարգում Գարիկ Կարապետյանը երկամարտի 411 կգ արդյունքով` երկու տարի անց, կրկին Եվրոպայի առաջնության ոսկե մեդալակիր դարձավ:
Հայաստանի տղամարդկանց հավաքականն էլ թիմային հաշվարկում առաջինն էր:
