Հռոմի Ֆրանցիսկոս պապի մարմինն անձնական նստավայրից՝ Սանտա Մարտայից, որտեղ նա մահացել է ապրիլի 21-ին, տեղափոխվել է Սուրբ Պետրոսի տաճար։ Ինչպես հաղորդում է ՏԱՍՍ-ը, շուտով կսկսվի հանրային հրաժեշտը։
Կարդինալ-կեմերլենգո Քևին Ֆարելը, որը նախագահում է թաղման ծեսը, հուղարկավորության աղոթքը կատարել է նախքան աճյունը տեղափոխելը։
Արարողությանը մասնակցում են կարդինալներ, արքեպիսկոպոսներ, եպիսկոպոսներ և եկեղեցու սպասավորներ։ Նրանք երթով քայլել են դագաղի դիմաց՝ հրապարակով։ Հրապարակում տեղակայվել է շվեյցարական գվարդիայի պատվո պահակախումբ։ Պոնտիֆիկոսին հրաժեշտի ամբողջ ծեսը նկարագրված է հատուկ փաստաթղթում, սակայն Ֆրանցիսկոսն իր կենդանության օրոք դրանում որոշակի փոփոխություններ է կատարել՝ պարզեցնելով ընթացակարգը։ Հավատացյալները հավաքվել էին Սուրբ Պետրոսի հրապարակում։
Իշխանությունների մոտավոր հաշվարկներով՝ սպասվում է մինչև 100,000 մարդ։ Հռոմում անվտանգության աննախադեպ միջոցառումներ են ձեռնարկվել. Սուրբ Պետրոսի հրապարակը և տրանսպորտային հանգույցները դրվել են հատուկ հսկողության տակ։ Երկնքում հայտարարվել է թռիչքազերծ գոտի, գործարկվել է անօդաչու թռչող սարքերի հետախուզման համակարգը։ Ֆրանցիսկոսին հրաժեշտը կտևի մինչև ապրիլի 25-ը, հուղարկավորությունը տեղի կունենա ապրիլի 26-ին՝ պետությունների և կառավարությունների ղեկավարների, թագադրված ղեկավարների, հոգևոր ու կրոնական ներկայացուցիչների ներկայությամբ։
