Հնդկաստանում Պակիստանի գործերի ժամանակավոր հավատարմատար Սաադ Ուարայչին հրավիրվել է Հնդկաստանի ԱԳՆ: Պատճառը Հնդկաստանի հյուսիսում տեղի ունեցած ահաբեկչությունն է: Այս մասին հայտնում են հնդկական լրատվամիջոցները։
Ապրիլի 22-ին Հնդկաստանի հյուսիսում տեղի ունեցած ահաբեկչությունն ամենախոշորն էր վերջին տարիների ընթացքում՝ խլելով 26 մարդու կյանք։ Նրանց մեծ մասը զբոսաշրջիկներ էին։
Հնդկաստանի վարչապետ Նարենդրա Մոդին երկրի բոլոր կուսակցությունների ղեկավարներին կոչ է արել հանդիպել հինգշաբթի՝ որոշելու, թե ինչպես արձագանքել այդ հարձակմանը:
Ինչպես հաղորդում է «Press Trust of India» գործակալությունը՝ Պակիստանի քաղաքացիներն արդեն սկսել են մեկնել իրենց հայրենիք՝ կապված հնդկական իշխանությունների կողմից դրա համար 48-ժամյա ժամկետ սահմանելու հետ:
Պակիստանը, ի պատասխան դրա, փակել է իր օդային տարածքը հնդկական ինքնաթիռների համար և նաև հայտարարել Հնդկաստանի հետ ամբողջ առևտրի անհապաղ դադարեցման մասին, ներառյալ երրորդ երկրների միջոցով տարանցումը:
The New York Times-ը (NYT) գրում է, որ միջուկային տերություններ հանդիսացող Հնդկաստանի ու Պակիստանի հարաբերությունների սրումը սպառնում է նոր զինված հակամարտությամբ։ «Կողմերի միջև լարվածության նոր ալիքը սկսվել է անցած գիշեր, և այն կլինի ավելի մեծ մասշտաբով, քան 2019 թվականի փետրվարին», — հրատարակությունը մեջբերում է պակիստանցի վերլուծաբան Սայեդ Մուհամմադ Ալիի խոսքերը։
