Կառավարության նիստին էի, այդ պատճառով չեմ հասցրել ծանոթանալ տեղեկատվությանը, ծեծկռտուքի և քրեական վարույթ նախաձեռնելու և այլ հարցերի հետ կապված մենք ուղղակի պատասխանատուն չենք, բայց հիմա անմիջապես վերադառնամ գրասենյակ, հասկանամ, թե մեր գործառույթների շրջանակում ինչ անելիք կա ու տեղեկատվություն կփոխանցեմ: Այս մասին կառավարության նիստից հետո լրագրողների հետ զրույցում ասաց ՄԻ պաշտպան Անահիտ Մանասյանը:
Ինչ վերաբերում է նախօրեին Նոր Նորքի թաղապետ Տիգրան Տեր-Մարգարյանի հնչեցրած հայհոյանքներին՝ Մանասյանը նշեց, որ ամենակարևոր օղակներից է համարում պաշտոնյաների էթիկայի և նրանց բարեվարքության ինստիտուտը:
«Չեմ ասի, որ դա ՀՀ-ում գոյություն չունի, միանշանակ, կան կառույցներ, որոնք զբաղվում են այս հարցերով։ Ըստ էության՝ Մարդու իրավունքների պաշտպանի գրասենյակը չէ, որ զբաղվում է պաշտոնատար անձանց էթիկային վերաբերող հարցերով։ Համարում եմ, որ այդ ինստիտուտը ՀՀ-ում բավարար չափով կայացած չէ։ Կարծում եմ՝ յուրաքանչյուր նման դեպքով էթիկայի հարցը քննարկման առարկա պետք է դառնա»,- ասաց նա։
Մանասյանը նշեց, որ ՀՀ-ում մարդու իրավունքների պաշտպանության մասով բազմաթիվ խնդիրներ կան: «Դրանք վերաբերում են տարբեր ոլորտների, խնդիրների ու դրանք պետք է լուծումներ ստանան»,- ասաց նա։
