Գյումրեցի լրագրող Լիլիթ Աղեկյանին հիվանդանոցից կրկին տեղափոխել են Գյումրու ոստիկանության Մուշ բաժնի ձերբակալվածների պահպանման վայր։ Այս մասին NewDay.am-ի հետ զրույցում ասաց Զարուհի Փոստանջյանը։ «Լիլիթ Աղեկյաի նկատմամբ կատարվում են ակնհայտ ոչ իրավաչափ գործողություններ, հետապնդում։ Ժամը 12։00-ին կալանքի նիստ է նշանակված։ Ինձ հրաժարվում են ներգրավել որպես պաշտպան»,-մանրամասնեց Զարուհի Փոստանջյանը։ Նա հիշեցրեց, որ 2025 թվականի մայիսի 8-ին, ժամը 19:00-ի սահմաններում մի խումբ ոստիկաններ ներխուժել էին հետաքննող-լրագրող Լիլիթ Աղեկյանի բնակարան առողջական խնդիրներ ունեցող տարեց մոր առջև՝ ձեռքերը ոլորելով ձերբակալել և տարել են ոստիկանական բաժանմունք, որտեղ էլ Լիլիթ Աղեկյանի ինքնազգացողությունը վատացել էր։ Լիլիթ Աղեկյանին մեղադրում են խուլիգանական դրսևորումներով Գյումրու թիվ 32 դպրոցի տնօրենին՝ Արմինե Սուքիասյանին և դատավորին դատավարության շրջանակներում կոռումպացված անվանելու մեջ։ « Ասում են՝ ես վկա եմ եղել, չեմ կարող ներգրավվել որպես պաշտպան, ինչը այդպես չէ․ ես վկա չեմ։ Արմինե Սուքիասյանը 7 հայց էր ներկայացրել Լիլիթ Աղեկյանի դեմ, 5-ը դատարանում հաղթել ենք, ապացուցվել է, որ զրպարտություն չի եղել։ Մնացած գործերը դեռ քննվում են։ Հիմա ասում են՝ խուլիգանություն է արել»,-ասաց նա։
