Շուշիի ազատագրման օրը կազմակերպված «Շուշի. վերադարձ լինելու է» խորագրով միջոցառմանը ՀՅԴ Հայաստանի Գերագույն մարմնի ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը պատասխանեց Aravot.am-ի հարցերին:
-Այսօր ի՞նչ զգացողություններ ունեք:
-Ուրախության, որ կարողացել ենք այն ծանր պայմաններում ազատագրել Շուշին, որը բեկումնային էր Արցախի ազատագրական պայքարի համար: Կա նաեւ ամոթի զգացում, որ դավաճանության եւ պարտության արդյունքում Շուշին հանձնվեց եւ դրանից հետո Արցախը կորցրինք: -Այս միջոցառման կարգախոսն է. «Շուշի. վերադարձ լինելու է»: Ինչպե՞ս եք պատկերացնում վերադարձը:-Առաջին: Պետք է թույլ չտանք, որպեսզի փակեն Արցախի էջը եւ հրաժարվել վերադարձի հնարավորությունից: Վերադարձի իրավունքը որեւէ մեկը չի կարող մեզանից խլել: Եվ դրա լիարժեք կենսագործման հնարավորությունը կլինի, եթե մենք Հայաստանում ունենանք այնպիսի իշխանություն, որը միջազգային հարթակներում հետապնդի, բարձրաձայնի այդ հարցը եւ հետեւողական լինի: Պարզ է՝ վաղվա մասին չէ խոսքը: Պետք է պահպանել եւ ամրագրել այդ իրավունքը, հետո քայլեր ձեռնարկել դա իրականացնելու համար: Այդ մասին մենք բազմաթիվ անգամներ խոսել ենք միջազգային տարբեր հարթակներում: Ու շատ կարեւոր է նաեւ ամրագրել այն, ինչ տեղի է ունեցել Արցախում: Իսկ Արցախում տեղի է ունեցել էթնիկ զտում եւ ցեղասպանություն:
