Ստամբուլում Ուկրաինայի և Ռուսաստանի ներկայացուցիչների միջև բանակցություններն ավարտվել են։ Թուրքիայի արտաքին գործերի նախարարության տվյալներով՝ հանդիպումը, որը տեղի է ունեցել մայիսի 16-ին, ուրբաթ, Թուրքիայի միջնորդությամբ, տևել է մոտ մեկուկես ժամ և նպատակաուղղված է եղել Ուկրաինայում պատերազմի հնարավոր դադարեցմանը։ Քննարկումների արդյունքների և կոնկրետ բովանդակության մասին դեռևս ոչինչ հայտնի չէ։ Սրանք հակամարտության կողմերի միջև առաջին ուղիղ բանակցություններն էին 2022 թվականից ի վեր։
«Ինտերֆաքս» գործակալությունը, հղում անելով բանակցությունների ընթացքին ծանոթ աղբյուրին, հայտնել է, որ Ռուսաստանի և Ուկրաինայի պատվիրակությունները ընդմիջում են վերցրել։ «Բանակցային գործընթացում դադար է հայտարարվել», — ասել է գործակալության աղբյուրը։ Իր հերթին, Ուկրաինայի ներկայացուցիչը հայտարարել է, որ մայիսի 16-ի բանակցությունները կարող են շարունակվել, սակայն դա ծրագրված չէ։
