Ինչպես հայտնում է ֆոտոլրագրող Գագիկ Շամշյանը, երեկ՝ մայիսի 21-ին, հերթական օպերատիվ տեղեկություններն են ստացվում ոստիկանության Շենգավիթի բաժին, որ Բագրատունյաց պողոտայում «Ozon»-ի հարևանությամբ գտնվող վճարային տերմինալը մեկ հոգի փորձում է կոտրել:
Օպերատիվորեն ժամանում են Շենգավիթի ոստիկանության բաժնի ծառայողները՝ հատկապես կարևոր գործերով ավագ համայնքային ոստիկան Սահակյանի գլխավորությամբ և գողություն կատարելու անմիջականորեն ծագած հիմնավոր կասկածի առկայության հիմքով նշված վայրից ոստիկանության Շենգավիթի բաժին են տեղափում Երևանի բնակիչ 31-ամյա Մուշեղ Մ.-ին:
Փաստերի ճնշման տակ վերջինս խոստովանում է, որ ինքը կոտրել է վճարային տերմինալի ապակին և փորձել է այնտեղ եղած դրամապահոցից գումար գողանալ, սակայն ոստիկանների կողմից կանխվել է այդ ամենը:
Դեպքի փաստով Շենգավիթի ոստիկանությունում փաստաթղթեր են կազմվել, որոնք փոխանցվել են ՀՀ քննչական կոմիտեի Երևան քաղաքի քննչական վարչության Շենգավիթի քննչական բաժին, որտեղ դեպքի փաստով նախաձեռնվել է քրեական վարույթ:
