Թուրքիայի իշխող «Արդարություն և զարգացում» կուսակցությունը քննարկում է գործող նախագահ Ռեջեփ Թայիփ Էրդողանին խորհրդարանում քվեարկության միջոցով երրորդ ժամկետով նախագահի թեկնածու առաջադրելու տարբերակը: Այս մասին հայտնել է թուրքական կառավարամետ Türkiye թերթը՝ հղում անելով իր աղբյուրներին:
Արտահերթ ընտրություններ հայտարարելու համար անհրաժեշտ է 360 պատգամավորի ձայն, խոշորագույն ընդդիմադիր «Ժողովրդա-հանրապետական» կուսակցությունն այս պահին ունի 127 մանդատ, իսկ իշխող «Արդարություն և զարգացում» կուսակցության և «Ազգայնական շարժում» կուսակցության դաշինքը՝ 315:
«Սահմանադրության համաձայն՝ նախագահ Էրդողանը կրկնակի առաջադրման երկու ճանապարհ ունի։ Կամ խորհրդարանը որոշում կկայացնի ընտրությունների մասին, կամ Սահմանադրության 101-րդ հոդվածը, որը վերնագրված է «նախագահի թեկնածությունն ու ընտրությունը», կփոխվի: Իշխող կուսակցության կարծիքով՝ Սահմանադրության մեջ փոփոխություններ կատարելու փոխարեն Էրդողանի համար թեկնածու դառնալու ավելի խելամիտ միջոց ևս մեկ անգամ կլինի խորհրդարանի կողմից ընտրությունների մասին որոշման ընդունումը», — հայտնել է պարբերականը։
