Ես ցավում եմ, բայց դուք այդ զեկուցողի հոգեվիճակից դուրս գալ չկարողացաք, առաջ գոնե միայն Նիկոլ Փաշինյանին էիք զեկուցում հիմա ամբողջ ՔՊ խմբակցությա՞ն, հա՞, այդքան ընկնե՞լ: Այս մասին ԱԺ-ում իր ելույթում ասաց «Հայաստան» խմբակցության պատգամավոր Քրիստինե Վարդանյանը։
Անդրադառնալով «Հայաստան» խմբակցության քարտուղար ԱրծվիկՄինասյանին անձեռնմխելիությունից զրկելու միջնորդությանը՝ Քրիստինե Վարդանյանը նշեց,որ դատախազը չի կարողանում պատասխանել երեք պարզ հարցի՝ Արծվիկ Մինասյանի օրո՞ք է կառուցվել Սեյրան Օհանյանի ենթադրյալ ապօրինի շինությունը, ինչը դատախազը ժխտում է, Արծվիկ Մինասյանը լիազորություն չուներ նաև քանդելու այդ շինությունը, նաև «հանցավոր դիտավորությամբ» այդ շինությունը չի օրինականացվել, չի եղել նաև օրենքի կետ, որում ամրագրված է, որ երբ Սեյրան Օհանյանին ենթադրաբար պատկանող հողատարածքն ուղարկել է կառավարություն, պետք է անպայման նշեր, որ կառուցապատման ենթակա հողի վրա արդեն կա կառուցած շինություն։
«Հիմա գործի հիմքը, որն է, չեք կարողանում դրդապատճառներն ասեք, չեք կարողանում խմբի անդամներին նշեք, նախանձելի վիճակում եք՝ մի խոսքով։
Դուք իրականացնում եք քաղաքական հետապնդում՝ բութ գործիք դարձած, գալիս եք, ասում եք։ Այ թե ինչպես է լինում, որ հենց ժողովրդավարության բաստիոնում հենց ընդդիմադիր պատգամավորներն են ԱԺ-ում զրկվում անձեռնմխելիությունից և հենց ժողովրդավարության բաստիոնում են ընդդիմադիրները գաղտնալսվում։
Այստեղ գալիս ասում ենք՝ քաղաքական հետապնդում եք իրականացնում, ասում են՝ քաղաքական հետապնդում չէ, ուղղակի դուք բոլորդ հանցագործներ եք։Հետաքրքիր մի իրավիճակ է, դուք մի երկրում եք իշխանության, որտեղ բոլորը շպիոններ են, հանցագործներ ու միակ մաքուր և սուրբ անձնավորությունները դուք եք։ Դուք եկեղեցու մաքրամաքրությունները պահպանելու համար արշավ եք սկսում եկեղեցու նկատմամբ ու շատ պատահականորեն կալանքի տակ են հայտնվում ձեզ ամենասուրը քննադատող երկու սրբազաններ, ովքեր եկեղեցում հայտնի են իրենց մաքրակենցաղությամբ»,-ասաց Քրիստինե Վարդանյանը։
