Հունիսի 27-ին Հանրային հեռուստաընկերությունը հարցազրույցի էր հրավիրել Նշան Հովհաննիսյանին ու նրան ներկայացրել, իբր, հոգևորական, մինչդեռ, տվյալ անձը 2017 թվականին կարգալույծ է հռչակվել։
Նշան Հովհաննիսյանն, ընդ որում, երկու անգամ է կարգալույծ հռչակվել։
Առաջին անգամ կարգալույծ լինելով՝ նա մեղայականով դիմել է Վեհափառ Հայրապետին՝ վերականգնվելու իր հոգևոր կարգավիճակի և ծառայության մեջ ու նրա համար միջնորդել և երաշխավոր է կանգնել Բագրատ Սրբազանը, երկրորդ անգամ կարգալույծ լինելով՝ ամոթահար է թողել Բագրատ Սրբազանին։
Նշան Հովհաննիսյանի՝ Կալկաթայի Հայոց Մարդասիրական ճեմարանում ծառայության տարիների մասին տարբեր տեղեկություններ են շրջանառվում, մասնավորապես, թե ինչ վատ է վերաբերվել սաների հետ և այլն։
Այդ մասին հայտարարել էր նաև ճեմարանի նախկին սաներից մեկը՝ փակագծեր չբացելով։
Aysor.am-ը գրավոր հարցում էր ուղարկել Մայր Աթոռ Սուրբ Էջմիածին՝ խնդրելով տեղեկություն տրամադրել, թե ի՞նչն է հիմք հանդիսացել Նշան Հովհաննիսյանին երկու անգամ կարգալույծ անելու համար։
Մայր Աթոռի տեղեկատվական համակարգի տնօրեն Տեր Եսայի քահանա Արթենյանն Aysor.am-ին հայտնել է, որ տվյալ անձն առաջին անգամ կարգալույծ է հռչակվել ծառայության վայրը ինքնակամ լքելու, առանց արտոնության արտասահման մեկնելու և դրանից հետո հրաժարականի դիմում ներկայացնելու համար։
«Իսկ երկրորդ անգամ կարգալույծ է հռչակվել կրկին ծառայության վայրը ինքնակամ լքելու համար»,- նշել է Տեր Եսային։
Այս ֆեյք հոգևորականով չսահմանափակվելով՝ Հանրային հեռուստաընկերությունը երեկ էլ ֆեյք սարկավագի էր տաղավար հրավիրել՝ ոմն Արթուր սարկավագ Կարապետյանի։
Aysor.am-ը պարզել է, որ Հ1 հրավիրված կեղծ սարկավագը որևէ տեղ ծառայություն չի իրականացնում։
«Ինքն իր ուսումը կիսատ թողած մեկն է և որևէ առնչություն չունի հոգևոր ծառայության հետ»,- Aysor.am-ին հայտնել է Մայր Աթոռի տեղեկատվական համակարգի տնօրեն Տեր Եսայի քահանա Արթենյանը։
