Սրբազանը Էջմիածնում էր, ես քաղաքապետարանում էի։ Սրբազանին տարել են Էջմիածնից, իսկ ես քաղաքապետարանում իմ աշխատանքն եմ արել: Այս մասին Armlur.am-ի հետ զրույցում ասել է Գյումրիի քաղաքապետ Վարդան Ղուկասյանը` պատասխանելով այն հարցին, թե ուր էր հավատքով քաղաքապետը, երբ ԱԱԾ-ն փնտրում էր Սրբազանին:
Նա նշել է, որ դեմ է եպիսկոպոսների և սրբազանների հանդեպ Հայաստանի Կառավարության նմանօրինակ վերաբերմունքին: Ղուկասյանը ասել է՝ ուզում եմ, որ եկեղեցին մաքրվի, բայց թող հստակ անունները տան` միաժամանակ մտածելով իրենց վարքուբարքի մասին, իրենց գրքերի մասին, որ կարդում ես՝ միայն այլասերվածություն է դուրս գալիս, իրենց թիմի մասին մտածեն:
Ղուկասյանը խնդրահարույց է համարել դպրոցական ծրագրից «Հայոց եկեղեցու պատմություն» առարկայի դուրսբերումը՝ նշելով, որ դա «դրսի ուժերի» ցանկությունն է, որ հայը չիմանա իր պատմությունը, ծանոթ չլինի իր ակունքներին:
Անդրադառնալով ձերբակալություններին՝ Գյումրու քաղաքապետը կարծիք է հայտնել, ասել, որ այն մարդիկ, որոնք ազատություն, հայրենիք, ճշմարտություն են սիրում՝ բոլորին ցանկանում են դատ ու դատաստանով ունեզրկել, բանտարկել, երկրից հեռացնել, թողնել ստրուկներին:
«Թողնել ստրուկներին, ստից 300,000-400,000 դրամներ աշխատավարձերը տալ, թևերը կաչատ անեն, ընկնեն խեղճ ժողովրդի ջանին: Սա է», -ասել է Ղուկասյանը: Նա հավելել է, որ ովքեր սիրում են իրենց հայրենիքը և լեզուն, պետք է ոտքի պիտի կանգնեն, պաշտպանեն իրենց հայրենի հողը:
