Համայնքային ոստիկանության Աշտարակի բաժնում ստացվել էր օպերատիվ տվյալ, որ Ոսկեվազ գյուղի բնակիչ 47-ամյա տղամարդը Արմավիրի մարզի Դողս գյուղի 50-ամյա բնակչից ձեռք է բերում, օգտագործում և իրացնում է «սուբուտեքս» տեսակի թմրամիջոց: Տվյալը ստուգելու ընթացքում նաև ստացվեց տեղեկություն, որ այս գործընթացին օժանդակում են 50-ամյա տղամարդու քույրն ու նրա որդին: Այս մասին հայտնում են ՆԳՆ-ից:
Դողս գյուղում դարանակալման ժամանակ Աշտարակի ոստիկանները նկատել են, որ ոսկեվազցին «Օպելը» կայանել է 50-ամյա տղամարդու տան մոտ, տանտերը մոտեցել է, և նրանք ինչ-որ բաներ են փոխանցել միմյանց:
Նույն օրը 47-ամյա ոսկեվազցին ձերբակալվել և իր վարած մեքենայով հանդերձ տեղափոխվել է Աշտարակի բաժին: Պարզվել է, որ նրա ավտոմեքենայում սուբուտեքսի երկու հաբ կա, որոնք ձեռք է բերել «տելեգրամով»՝ վճարելով 60 հազար դրամ:
