Մենք սկսել ենք խաղաղության պրոցես, որի ընթացքում, վստահ եմ՝ Ձեր թվարկած բոլոր խնդիրները լուծվելու են: Այս մասին ճեպազրույցի ժամանակ ասել է Տարածքային կառավարման և ենթակառուցվածքների նախարար Դավիթ Խուդաթյանը՝ պատասխանելով այն հարցին, թե ինչու Ադրբեջանի նախագահ Իլհամ Ալիևի առջև պահանջ չի դրվել թեկուզ մեկ օկուպացված տարածքներից զորքերը դուրս բերել, կամ, օրինակ՝ գոնե մեկ գերի վերադարձնել:
Հիշեցնենք, որ ավելի վաղ տեղեկացրել էինք, որ Սպիտակ տանը կայացած եռակողմ հանդիպումից հետո վարչապետ Նիկոլ Փաշինյանը՝ պատասխանելով ԶԼՄ-ների հարցերին, ասել էր՝ չկա այդպիսի բանակցություն, որտեղ իրենք այդ թեման՝ Ադրբեջանում անազատության մեջ գտնվող մեր հայրենակիցների թեման, չեն բարձրացնում:
«Քանի որ, ցավոք, դեռ արդյունք չկա, տեղի չի ունեցել այն՝ ինչ սպասում ենք, մենք պետք է ընկալենք, որ արդյունք չկա», -ասել էր նա, հավելելով՝ հումանիտար հարցերը առանձին վերցված լուծում չունեն և որ այս պատմական առաջընթացն է բերելու խնդիրների լուծմանը, այդ թվում՝ հումանիտար:
ԱՄՆ նախագահ Դոնալդ Թրամփը ևս անդրադարձել էր գերիների ազատման խնդրին, նշել, որ Ադրբեջանի նախագահին դիմել է 23 քրիստոնյաների համար:
«Կարծում եմ՝ նրանք կանեն դա ինձ համար: Սա կարևոր է, այնպե՞ս չէ»,-ասել էր նա:
