Մենք նշում ենք Արցախի անկախության տոնը ցավով, բայց միևնույն ժամանակ հպարտությամբ: Մենք երբեք չպետք է մոռանանք հպարտության մասին, որովհետև 1991 թվականին հայ ազգը, արցախցին, հայաստանցին, Սփյուռքի հայը ցույց են տվել իրենց միասնականությունը, կամքը և դա դարձել է գոյապայքարի և իրենց բնօրրանում ազատ ու անկախ ապրելու պայքարի մեկնարկը։ Այս մասին Եռաբլուր պանթեոնում լրագրողների հետ զրույցում ասել է «Հայաստանը ես եմ» նախաձեռնության ղեկավար Նաիրի Սարգսյանը:
«Մենք իրավունք չունենք դա երբեք մոռանալու, որովհետև դա մեր պատմության ամենափառավոր էջերից մեկն է, բայց ցավոք սրտի վերջին տարիներին արդեն մենք Արցախի Անկախության տոնը և Արցախի Հանրապետության տոնը նշում ենք մեծ ցավով, բայց միևնույն ժամանակ ցասումով: Իսկ Արցախ վերադառնալու վերաբերյալ՝ ես վստահ եմ, որ ես ինքս Արցախում նշելու եմ Արցախի Անկախության տոնը: Ունեմ այդ վստահությունը և ունեմ դրա համար հիմնավորումներ, որ դա հնարավոր է իրականացնել», — նշել է նա:
Նա նշել է, որ ներկա աշխարհակարգում չի կարելի երազանքները և նպատակները փոխել, պարզապես կարելի է ժամկետները փոխել, նոր ժամկետներ սահմանել, քանի որ նպատակի իրականացումը ձգելով չի նշանակում դրանից հրաժարվել:
«Այս իշխանությանը պետք է շատ շուտ փոփոխության ենթարկել, ռազմական բալանսը վերականգնել ու հետևողականորեն, անկոտրում կամքով գնալ նպատակի իրագործման հետևից: Նիկոլ Փաշինյանը հոգու խորքում գիտակցում է իրով լինելը, իր ազգադավ լինելը և միևնույն ժամանակ փորձում է հավաքագրել մեղսակիցներ։ Մեղքի իր չափաբաժնից հրաժարվելով և ժողովրդին հեղափոխություն չիրականացման մեջ մեղադրելով, փորձում է Արցախի հանձնման գործընթացը մեղսագրել ժողովրդին», — ասել է նա։
