Ես վատ եմ զգում, երբ որ մեր գործընկերները կլինեն լրագրող կամ ոչ լրագրող, կոնտեքստից կտրում են խոսքերը, տված հարցը և տված պատասխանը: Այս մասին կառավարության նիստից հետո լրագրողների հետ զրույցում ասաց աշխատանքի և սոցիալական հարցերի նորանշանակ նախարար Արսեն Թորոսյանը՝ անդրադառնալով վարչապետ Նիկոլ Փաշինյանի՝ «կառավարությունը ես եմ» հայտարարությանը:
«Վարչապետը կառավարության ղեկավարն է, ինչո՞ւ, ինչի՞ մասին է խոսքը, և այո, վարչապետն է ներկայացնում կառավարության դիրքորոշումը, կարևորագույն գրեթե բոլոր հարցերում, մենք էլ՝ մեր ոլորտային հարցերում: Մենք քվեարկում ենք օրենքներ, կառավարության որոշումներ և դրանով մասնակցում ենք այդ որոշումների կայացմանը, որոնք ի դեպ մշակվում են, նոր են հասնում կառավարության նիստին:
Աայսինքն, մենք մինչև այդ քննարկում ենք, մեր դիրքորոշումները արտահայտում ենք, փոփոխություններ ենք անում, շատ բաներ չեն հասնում կառավարության այդ թվում մեր դեմ լինելու պատճառով: Դա առողջ աշխատանքային գործընթաց է և վարչապետը որևէ սխալ բան չի ասել»,- ասաց նա:
Անդրադառնալով Լիպարիտ Դրմեյանի հեռացմանը՝ Թորոսյանն ասաց, որ չի ճանաչում:
Լրագրողների հիշեցմանը՝ Դրմեյանը վարչապետի աշխատակազմի միջազգային իրավական հարցերով ներկայացուցչի գրասենյակի ղեկավարն էր, ով նշել էր՝ ՀԷՑ-ի մասով արբիտրաժային դատարանի որոշումը պարտադիր է կատարման կառավարության կողմից, Թորոսյանը հայտարարեց. «Ես չգիտեմ Լիպարիտ Դրմեյանին, չգիտեմ ինքը ինչի համար է ազատվել և ժողովուրդ ջան, ունա՞կ եք լսելու պատասխանը, թե՝ չէ։ Երբ որ հարց եք տալիս, թույլ տվեք մինչև վերջ պատասխանեմ, թե չէ էլ չեմ անի ընդհանրապես»:
Լրագրողներն հակադարձեցին նրան, որ չսպառնա, ինչի ի պատասխան Թորոսյանն ասաց, որ կսպառնա: «Կսպառնամ, սովորեք աշխատել, հարգելի գործընկերներ»,- հայտարարեց նա ու հեռացավ:
