Մեր սահմանադրության և շատ սահմանադրությունների նախաբաններ նմանություններ ունեն, և այո՛, այդ խնդիրը, եթե խնդիր է, կարող է բարձրաձայնվել, բայց մեր դիրքորոշումը հետևյալն է. եթե մենք խնդիր չենք տեսնում մեր սահմանադրության մեջ, և ասում ենք, որ այն, ինչ բարձրաձայնվում է, օրինակ, Ադրբեջանի կողմից, խնդիր չէ, ինչպե՞ս բարձրացնենք դա որպես խնդիր այլ պետության համար: Բացարձակ տրամաբանական չէ: Այս մասին լրագրողների հետ ճեպազրույցում ասել է Արդարադատության նախարար Սրբուհի Գալյանը, անդրադառնալով այն պնդմանը, որ, որոշ սահմանադրագետներ գտնում են՝ Ադրբեջանի սահմանադրությունը տարածքային պահանջներ է ներկայացնում Հայաստանի նկատմամբ:
Գալյանը ևս մեկ անգամ ընդգծել է, որ Սահմանադրական դատարանը խնդրահարույց չէ համարել Հայաստանի Սահմանադրությունը, դրա փոփոխության մտադրությունը պետք չէ կապել Ադրբեջանի պահանջների հետ, որովհետև դա իրականությանը չի համապատասխանում:
Լրագրողի հարցին՝ իսկ ինչպե՞ս է ստորագրվելու «Խաղաղության պայմանագիրը», երբ ադրբեջանական կողմը պահանջում է սահմանադրության փոփոխություն, նա պատասխանել է.
«Ամեն դեպքում «Խաղաղության պայմանագիրը» նախաստորագրվել է: Բազմաթիվ անգամներ շեշտվել է՝ խաղաղությունը հաստատվել է, իսկ Սահմանադրություն փոխելը մեր ներքին գործն է, որևէ այլ մարդու, վերպետական մարմնի, պետության գործը չէ», — նշել է արդարադատության նախարարը:
Նա ասել է, որ խաղաղությունը գին ունի և այդ գինը վճարել թե չվճարել որոշում է ժողովուրդը: Գալյանը հավելել է, որ իրենք առաջնորդվում ենք խաղաղության օրակարգով, որը թելադրված է ժողովրդի կողմից։
Անդրադառնալով ռազմագերիների խնդրին, նա նշել է. «Դա ցավոտ հարց է, բայց այս ընթացքում նման կարգավիճակ ունեցող անձանց մեծ մասը, մեր պետության ջանքերի արդյունքում հետ է վերադարձվել Հայաստանի Հանրապետություն։ Ես լիահույս եմ, որ առաջիկայում զարգացումները կգնան այն ուղղությամբ, որ այն անձինք, որոնք գտնվում են ոչ մեր պետության տարածքում, կվերադարձվեն մեր պետություն», — եզրափակել է Սրբուհի Գալյանը։
