ՈւԵՖԱ-ի Չեմպիոնների լիգայի խաղի համար Ալմաթի ժամանած Մադրիդի «Ռեալը» տեղավորվել է InterContinental հյուրանոցում։ Ըստ Zakon.kz-ի՝ տարածվել են լուրեր, որ հյուրանոցը փակվել է այլ այցելուների համար՝ թիմի գտնվելու ընթացքում։
Այս խոսակցությունների առիթ է դարձել այն, որ հյուրանոցը շրջափակվել էր, և թույլ չէին տալիս մուտք գործել թիմի հետ կապ չունեցող անձանց։ Սեպտեմբերի 29-ի երեկոյան հյուրանոցի բոլոր պատուհանները մթագնված էին, ինչը տպավորություն էր ստեղծում, որ շենքը չի գործում։
SHOT Telegram-ալիքը հաստատել է, որ «Ռեալը» սեպտեմբերի 28-ից հոկտեմբերի 1-ը ամբողջությամբ վարձակալել է InterContinental հյուրանոցը՝ ֆուտբոլիստներին լիարժեք հանգիստ և գաղտնիություն ապահովելու նպատակով։ Գործարքի արժեքը կազմել է ավելի քան 278 միլիոն տենգե (մոտ 507,000 ԱՄՆ դոլար)։
Հյուրանոցն ունի 277 համար, որոնք բոլորն էլ վարձակալվել են թիմի կողմից։ Ստանդարտ համարի միջին գինը կազմել է 375 դոլար մեկ գիշերվա համար, իսկ լյուքս համարինը՝ 560 դոլար։ «Ռեալ Մադրիդը» Ալմաթի է ժամանել ավելի քան 40 հոգանոց պատվիրակությամբ։
Միևնույն ժամանակ, «Ռեալի» և ֆուտբոլի երկրպագուները վերջին օրերին շրջապատել էին հյուրանոցի տարածքը՝ հույս ունենալով տեսնել աստղային ֆուտբոլիստներին։ Սեպտեմբերի 29-ի գիշերը հարյուրավոր երկրպագուներ հավաքվել էին Ալմաթիի օդանավակայանում՝ «Կայրաթի» մրցակցին դիմավորելու համար։
«Կայրաթ»–«Ռեալ Մադրիդ» խաղի համար սեպտեմբերի 26–29-ը Ալմաթի է այցելել ավելի քան 5000 օտարերկրյա երկրպագու՝ Չինաստանից, Հնդկաստանից, Ռուսաստանից, Ճապոնիայից, Մեծ Բրիտանիայից, Իսպանիայից, Չեխիայից, ԱՊՀ երկրներից և Եվրոպայի այլ պետություններից։
