Եվրոպայի խորհրդի «Լրագրողների անվտանգության հարթակը» միացել է Հայաստանի ժուռնալիստների միության և միջազգային գործընկերների՝ Լրագրողների եվրոպական ֆեդերացիայի, Լրագրողների միջազգային ֆեդերացիայի, «Արդարություն լրագրողների համար» հիմնադրամի հայտարարություններին, որ վերաբերում է Antifake.am-ի «Իմնեմնիմի» փոդքասթի հեղինակներ Նարեկ Սամսոնյանի և Վազգեն Սաղաթելյանի կալանավորմանը։
Եվրոպայի խորհրդի «Լրագրողների անվտանգության հարթակն» Առաջին կարգի ահազանգ է հնչեցրել ՀՀ իշխանությանը («Առաջին կարգի» ահազանգ հնչեցվում է արտակարգ և ծանր իրավիճակներում, երբ սպառնալիքների, ոտնձգությունների, դրանց հետևանքների վտանգը խիստ բարձր է):
Միջազգային կազմակերպությունների ահազանգ-կոչը ներկայացնում ենք ստորև՝ կետերով․
«Նոյեմբերի 14-ին դատարանը Սաղաթելյանի և Սամսոնյանի նկատմամբ կիրառեց երկամսյա նախնական կալանք։ Դատավարությունը համարում ենք քաղաքական դրդապատճառներով պայմանավորված և Մարդու իրավունքների եվրոպական կոնվենցիայի մի շարք հոդվածներին հակասող։ Հետևյալ հետևողական գործողություններն ակնկալվում են․
Պարզաբանել խուլիգանության մեղադրանքների կիրառման իրավական հիմքերը, ինչպես նաև գործի շրջանակում առաջադրված ենթադրյալ «սպառնալիքների» իրավական հիմքերը։
Վերանայել Սաղաթելյանի և Սամսոնյանի կալանքի օրինականությունն ու անհրաժեշտությունը՝ նրանց ազատ արձակումն ապահովելու նպատակով՝ ՄԻԵԿ-ի (Մարդու իրավունքների եվրոպական կոնվենցիա) պահանջներին համապատասխան։
Հիմնավորել Antifake.am-ի լրագրողական սարքավորումների առգրավումը և վերադարձնել այդ սարքավորումները։
Տեղեկություններ տրամադրել քրեական վարույթի ընթացքի և կալանքի պայմանների վերաբերյալ»,-ասված է հայտարարության մեջ:
