Այսօր ամոթի օր է, ամոթի օր է ամեն օրը, երբ ունենք քաղբանտարկյալներ: Ամոթ է ողջ ժողովրիդին, որ հանդուրժում է իր պայծառ զավակների բանտարկությունը, այդ նույն ժողովրդի ապագայի, հավատամքի և արժանապատվության համար: Այս մասին Ազգային ժողովի դիմաց, բողոքի ակցիայի ժամանակ ասել է ՀՀԿ փոխնախագահ Արմեն Աշոտյանը:
«Ամոթանք պետք է տանք նաև Եվրոպական կառույցներին, բայց եկեք անկեղծ խոստովանենք, որ ամոթի առաջին կրողը մենք ենք՝ հայ ժողովուրդը, որ դեռևս չի հաջողել ոչ միայն փոխել այս խայտառակ իշխանությանը, այլև բանտերից ազատել իր լավագույն զավակներին»,-նշել է նա ՀՀԿ բողոքի ակցիայի ժամանակ: Նրանք պահանջում են ՀՀ քաղբանտարկյալների և Բաքվի հայ գերիների ազատ արձակումը:
Նա կոչ է արել ակցիայի մասնակիցներին քաղբանտարկյալների և հայ գերիների նկարներն ուղղել դեպի բանուկ փողոցը, որ բոլորը տեսնեն և հասկանան՝ չեն կարողանում ապահովել նկարներում պատկերված անձանց ազատությունը: Աշոտյանն այնուհետև առաջարկել է նկարներն ուղղել դեպի Ազգային ժողովի շենք:
«Այս կառույցում հիմա հյուրընկալվել է Եվրոպայի խորհրդի Մարդու իրավունքների հանձնակատարը: 25 տարի առաջ Հայաստանն անդամակցեց Եվրոպայի խորհրդին: Այն ժամանակ մենք հույս ունեինք, որ եվրոպական ինտեգրման ճանապարհը որքան էլ դժվար լինի անցնել՝ մեր երկրին բերելու է ազատություն, արժանապատվություն, հավասարություն, բարեկեցություն: 25 տարի անց փաստում ենք, որ այդ ամենը փուչիկ է, որ այդ ամբողջը կեղծ է, ցինիկություն է:
Եվրոպական կառույցները՝ Եվրոպական խորհրդից մինչև Եվրոպական հանձնաժողով, Եվրոպական պառլամենտից մինչև Եվրոպական օմբուդսմեն, կույր են, խուլ են և համր, երբ խոսքը գնում ՀՀ-ում, իրենց իսկ դավանած, քարոզած արժեքների պաշտպանության մասին»,-ասել է նա:
