Եկեղեցին հարվածները խոնարհությամբ տանում է, բայց թող իրենք վախենան Աստծո արդար դատաստանից: Աստված կպատժի այդ մարդկանց, և լիահույս ենք, որ Հայաստան աշխարհն այս վիճակին հասցնողներն արդար դատաստանի կարժանանան, «Պրեսսինգ» հաղորդման ժամանակ այս մասին հայտարարել է Հայ Առաքելական եկեղեցու Գուգարաց թեմի առաջնորդ Գերաշնորը Տեր Հովնան եպիսկոպոս Հակոբյանը:
Սրբազան Հայրը նշել է՝ Նիկոլ Փաշինյանը ցանկանում է Հայ Առաքելական եկեղեցին վերափոխել Անգլիկան եկեղեցու մոդելի, իրեն էլ նշանակել պետ, որ կարողանա նշանակել Եկեղեցու ղեկավարին:
«Եկեղեցին չի կարող պետական կցորդ լինել: Եկեղեցին անժամանակ է ժամանակների մեջ: Ինքը չի կարող Քրիստոսին ղեկավարել: Ինչ-որ մեկն իր հիվանդ երևակայությամբ եկեղեցու կարգ է փորձում փոխել: Բարոյականության հետ խնդիր ունեցողն ուզում է բարենորոգել Հայոց հազարամյա եկեղեցին»,- նշել է Սրբազանը։
Սրբազան Հոր խոսքով՝ ՔՊ-ականներին խանգարում է Հայոց պատմությունը, մեր՝ բնիկ լինելը, Մեսրոպ Մաշտոցը, մեր հոգևորական պատմիչները:
«Այս մարդիկ հոգևորականի սքեմը տեսնելիս այսահարվում են ու ուզում են գրականության, պատմության դասագրքերից հանել հոգևորական հեղինակներին, մինչև Սայաթ-Նովա: Թուրքերն էլ մինչև 18-րդ դար գրականություն չեն ունեցել, հավանաբար հենց իրենք էլ պատվիրել են»,- ասել է Հովնան Սրբազանը։
