Աջափնյակում երեկվա արյունալի կրակոցներից վիրավորվածներից մեկն այսօր՝ փետրվարի 19–ին դուրս է գրվել «Արմենիա» ԲԿ–ի դիածնոտային բաժանմունքից։ Այս մասին NEWS.am–ին հայտնեց «Արմենիա» բժշկական կենտրոնի գլխավոր տնօրենի վիրաբուժության գծով տեղակալ Աշոտ Կուրղինյանը։
Ավելի վաղ նա նշել էր, որ երեկ իրենց ԲԿ է տեղափոխվել է 7 անձ՝ տարբեր բնույթի վնասվածքներով, հիմնականում հրազենային, կրծքավանդակի, որովայնի խոռոչի շրջանում վնասվածքներով։ Նրանցից մեկը վնասվածքը ստացել է դեմքի շրջանում, ևս մեկը ստորին վերջույթների կոտրվածք ունի։
«Նրանցից մեկը հենց վիրասրահում մահացել է, բայց մնացած վեցի վիճակը այս պահի դրությամբ, արդեն մեկ օր հետո կայուն է։ Բոլոր վեցն էլ վիրահատվել են։ Այսօր իրենց հեմոդինամիկ ցուցանիշները լրիվ կայուն են, նույնիսկ ենթակա են վերակենդանացման բաժանմունիքից այլ բաժանմունքներ տեղափոխման։ Դա ենթադրում է, որ իրենց վիճակը կայուն է, այս պահին կյանքին սպառնացող չէ և ռեանիմացիոն միջոցառումներ չի ենթադրում։
Նրանցից երկուսն արդեն տեղափոխվել են, մեկը դիմածնոտային բաժանմունք, մյուսը՝ տրավմատոլոգիայի բաժանմունք։ Մնացած չորսը այսօր կտեղափոխվեն տարբեր բաժանումներ՝ կրծքային վիրաբուժություն, անոթային և տրավմատոլոգիա»,–ասաց նա՝ հավելելով, որ վիրավորները, հիմնականում, միջին տարիքի են։
Հարցին՝ ե՞րբ նրանք կարող են դուրս գրվել, նա պատասխանեց. «Դուրս գրումը կախված է արդեն հիվանդության հետագա ընթացքից, կարող է ձգձգվող ընթացքներ լինել, կարող է և դուրս գրվեն շատ արագ։
Կուրղինյանը նաև շնորհակալություն հայտեց ոստիկանությանը. «որովհետև իրենց ներկայությունը ապահովել է մեր հանգիստ աշխատանքը և աշխատանքային ռիթմը պահպանել է»։
Ավելի վաղ NEWS.am–ը հայտնել էր, որ փետրվարի 18-ին, մարտաֆիլմ հիշեցնող կրակոցներ են հնչել Աջափնյակ թաղամասի Աբելյան փողոցի 9 հասցեում. կան վիրավորներ։ Համացանցում տեսանյութ է տարածվել, որտեղ երևում են, թե ինչպես են մի խումբ անձինք կրակում միմյանց վրա։
Նշված վայրից հրազենային վնասվածքներով 10 քաղաքացիներ տեղափոխվել են Երևանի տարբեր հիվանդանոցներ։ Դեպքի վայրում հայտնաբերվել են ինքնաձիգից և ատրճանակից կրակված մի քանի պարկուճներ, արնանման հետքեր, դանակ, «Lexus» մակնիշի ավտոմեքենա, որի վրա առկա են կրակոցի հետքեր։
Վիրավորներից մեկը հիվանդանոցում մահացել է, վիրավորներից երեքի վիճակը ծայհրահեղ ծանր է, երեքինը՝ ծանր։
