102-րդ ռուսական ռազմաբազան մինչ օրս չի փակել Հայաստանի տեսադաշտը Արևմուտքի հետ համագործակցություն կառուցելու ճանապարհին։ Մարտի 5-ին Կառավարությունում կայացած ճեպազրույցի ժամանակ այս մասին հայտարարել է վարչապետ Նիկոլ Փաշինյանը՝ պատասխանելով այն հարցին, թե արդյոք բազան չի խանգարում Արևմուտքի նկատմամբ Հայաստանի վարած քաղաքականությանը։
Նա հարցադրումը համարել է ոչ կոռեկտ՝ ասելով, որ Հայաստանը ոչ մի տեղ չի գնում։ «Բարեբախտաբար թե դժբախտաբար, ճանապարհի այն կետում չենք, որ ռուսական ռազմաբազան մեր ճանապարհը փակի, երբ կտեսնենք, որ ռուսական ռազմաբազան մեր տեսադաշտը փակում է, այդ ժամանակ կմտածենք՝ ոնց շարժվենք, որ տեսադաշտի խնդիր չունենանք:», — պարզաբանել է Փաշինյանը
Կառավարության ղեկավարը նաև ընդգծել է, որ Հայաստանը իր առջև Ռուսաստանի հետ հարաբերությունները վատթարացնելու խնդիր չի դնում։ «Մենք խնդիրներ չունենք, չենք ունեցել և չենք ունենալու՝ Ռուսաստանի հետ հարաբերություններ վատացնելու։ Մենք խնդիր չենք ունեցել, չունենք և չենք ունենալու՝ Ռուսաստանի շահերին վնասելու», — հավաստիացրել է Նիկոլ Փաշինյանը։
