Փոփոխությունը գալիս է, ուժեղ Հայաստանում կրթված մարդը շատ արագ աշխատանք է գտնելու: Այս մասին ասել է «Ուժեղ Հայաստան» կուսակցության խորհրդի անդամ Նարեկ Կարապետյանը:
«Դրսում, երբ երիտասարդը համալսարան է ավարտում, նրան շատ արագ գործատուներից առաջարկներ են գալիս, իսկ Հայաստանում, երբ երիտասարդը ծնողների օգնությամբ՝ այդքան տարի սովորելով, ավարտում է համալսարանը, նա է փնտրում աշխատանք ու շատ դժվար է գտնում: Խնդիրը կրթական համակարգի մոտեցման մեջ է, օրինակ՝ Գերմանիայի Էկոնոմիկայի նախարարությունը պատվեր է իջեցնում Կրթության նախարարությանը ու ասում է՝ ինձ պատրաստիր 10,000 ինժեներ, 20,000 ծրագրավորող:
Ես սովորել եմ ԵՊՀ-ի Միջազգային hարաբերություններում և մեր ամբողջ կուրսում գրեթե 1 հոգի չկա, որ մասնագիտությամբ է աշխատում, դա նշանակում է 4 տարի վատնած ժամանակ, միլիոնավոր դրամներ ծնողների կողմից, և ոչ մի արդյունք իրենց մասնագիտության ուղղությամբ:
Ուժեղ Հայաստանում Էկոնոմիկայի նախարարությունը պատվիրելու է Կրթության նախարարությանը բացել համալսարաններում տեղեր, տարբեր ուղղություններ, և ես երաշխավորում եմ, որ 4 տարի հետո նրանք բոլորը կունենան աշխատանք: Դա ծնողների համար երաշխավորություն է, որ այդքան տարի իրենց գրպանից վճարելով երեխայի ոչ միայն կրթությունը, այլև շրջաններից եկողների դեպքում՝ բնակվելու գումարը, իրենց երեխան շատ արագ հնարավորություն կունենա Հայաստանում աշխատանք գտնելու, դա կփոխի Հայաստանում կրթության հանդեպ վերաբերմունքը»,- նշել է նա:
