Ֆրանսիայի նախագահ Էմանուել Մակրոնը և Միացյալ Թագավորության վարչապետ Քիր Սթարմերը ուրբաթ օրը՝ ապրիլի 17-ին, տեսակոնֆերանսի ձևաչափով բանակցություններ կվարեն մի քանի երկրների հետ՝ Հորմուզի նեղուցում նավագնացության անվտանգության հարցի շուրջ։ Այս մասին հայտնել է Agence France-Presse-ը՝ վկայակոչելով Ելիսեյան պալատը, հաղորդում է ՏԱՍՍ-ը:
Մասնակիցների ցուցակը չի հստակեցվում։ Կողմերը մտադիր են ընդգծել, որ գլխավոր պայմանը լինելու է մարտական գործողություններին չմասնակցելը և այս նախաձեռնության շրջանակներում երկրների ջանքերի բացառապես պաշտպանական բնույթը։
Հորմուզի նեղուցում նավագնացության անվտանգության հարցով նախորդ համաժողովը կազմակերպվել էր Միացյալ Թագավորության ԱԳՆ-ի կողմից ապրիլի 2-ին՝ արտաքին գործերի նախարարների մակարդակով։ Դրան մասնակցել էին Եվրոպայի, Ասիայի, Մերձավոր Արևելքի և Լատինական Ամերիկայի ավելի քան 40 երկրների ներկայացուցիչներ, Միջազգային ծովային կազմակերպության գլխավոր քարտուղար Արսենիո Դոմինգեսը և Եվրամիության պաշտոնյաներ։ Ավելի ուշ Լոնդոնը նույն թեմայով վիրտուալ հանդիպում էր անցկացրել ավելի քան 30 երկրների ռազմական պլանավորողների մասնակցությամբ։
