Լինում է, չի լինում, մի թագավորություն է լինում, այս թագավորությունում մի թագավոր է իշխում, որը ոչ մի բան չի կարողանում անել, բացի լավ խոսելուց և իր մեղքերը մարդկանց վրա բարդելուց։ Այս մասին ասել է «Ուժեղ Հայաստան» կուսակցության խորհրդի անդամ Նարեկ Կարապետյանը:
«Մի օր թագավորության ժողովուրդը հոգնում է և որոշում է փոխել նրանց։ Ընտրում է իր թագավորության առաջնորդին: Այս մարդը գալիս է, սկսում է թագավորության տարբեր ծայրերում բացել տարբեր կենտրոնակայաններ և մարդկանց քարոզել, որ պետք է փոփոխություն՝ պետք է երկիրը վերջապես ձեռք բերի իր երբեմնի փառքը։
Թագավորը՝ իմանալով այդ մասին, կանչում է իր Նազիր Վեզիրներին և վախեցած հարցնում է նրանց՝ ժողովուրդը իմ դեմ է, ի՞նչ պետք է անենք, որ թագը մնա մեզ: Նազիր Վեզիրներից նրան խորհուրդ են տալիս, ասում են՝ եկեք բոլորին բռնել տանք, գործ սարքենք բոլորի վրա: Մի օր բռնում են, ժողովուրդը ջղայնանում է և նրանք հասկանում են, որ ժողովրդին դուր չի գալիս։ Երկրորդ օրը բռնում են պայքարողներին, էլի ժողովուրդը ջղայնանում է, 7-րդ օրը ժողովուրդն արդեն ասում է՝ հերիք է, խելոք մնացեք և թողեք մեր թագավորությունը՝ մեր ձևով կկառավարենք:
Այսպես թագավորությունը տարիներ հետո դառնում է ուժեղ ու հզոր թագավորություն, իսկ այդ թագավորին, ով փորձում էր խանգարել, փոխում են և ուղարկում են ուրախ կառքով ման գալու, ժողովուրդն էլ վերատնկում է իր այգիները և սկսում պաշտպանել իր սահմանները»,- նշել է Կարապետյանը:
