Իմ որոշումն է նախընտրական ցուցակում չլինել, թարմացված դաշինքի մեջ նաև պետք է լինի որոշակի թարմացում, ես ինձ տեսնում եմ դաշինքի կազմում՝ Ռոբերտ Քոչարյանի գլխավորությամբ: Այս մասին խորհրդարանական ճեպազրույցների ժամանակ ասել է Պաշտպանության նախկին նախարար Սեյրան Օհանյանը:
«Ես Հայ Հեղափոխական Դաշնակցության, «Առաջ» կուսակցության հետ միասին պայքարը շարունակելու եմ, իրենց հետ եմ լինելու, պայքարս շարունակելու եմ թե գաղափարական, թե գործողությունների մնացած բոլոր հարթակներում՝ աջակցելով իմ գործընկերին և Ազգային ժողովում, և մնացած բոլոր հարթակներում: Եթե հնարավորություն լինի, նաև գործադիրում և մնացած անկախ մարմիններում։
Ես դաշինքի կազմում եմ և դաշինքի հետ եմ լինելու, ընդդիմադիր դաշտի ընդհանուր հաջողությունները նաև մեր հաջողություններն են լինելու, ինչ վերաբերում է մեր պատգամավորներին, որոնք ընդգրկված են այս կամ այն ուժերի հետ, դա կապված է մասնագիտական գործունեության շրջանակներում տվյալ ուժերին աջակցությանը և նախկին համատեղ կուսակցական, խորհրդարանական գործողություններին, ես այդ ամենը նորմալ եմ համարում»,- նշել է նա:
