Քոչարյանը չի կարողանա մարդկանց մոբիլիզացնել. Փաշինյանի շանսերն ավելի շատ են: Այս մասին հայտնել է Ադրբեջանի նախկին արտգործնախարար Էլմար Մամեդյարովը՝ ադրբեջանական լրատվամիջոցների փոխանցմամբ։
Հայաստանի կախվածությունը Ռուսաստանից, նախևառաջ ռազմաքաղաքական և տնտեսական հարցերում, ձևավորվել է հենց այն ժամանակաշրջանում, երբ իշխանության ղեկին էին հենց Քոչարյանն ու իր համախոհները։
«Հենց Քոչարյանի ժառանգությունն է բաժին հասել Փաշինյանին։ Եվ ես կարծում եմ, որ նույնիսկ եթե Փաշինյանը չցանկանա, Ռուսաստանի ազդեցությունը Հայաստանի վրա միևնույն է կպահպանվի»,- ասել է նա։
Նրա խոսքով՝ այս բոլոր հայտարարություններն առաջին հերթին նախընտրական պայքարի տարր են։
«Քոչարյանը չի կարող չքննադատել Փաշինյանին, քանի որ նրա մրցակիցն է։ Ես կարծում եմ, որ դա սխալ է, որովհետև ցանկացած սթափ դատող Հայաստանի քաղաքացի կհասկանա, որ նրա փաստարկներն անհիմն են»,- պարզաբանել է փորձագետը։
Անդրադառնալով Քոչարյանի այն խոսքերին, թե TRIPP-ը խնդիրների կհանգեցնի Հայաստանի համար, քաղաքագետը նշել է, որ Հայաստանի ընդդիմադիրներն ի սկզբանե դեմ են եղել TRIPP-ին։ Թեև, դատելով վերջին վերլուծություններից, շահագրգիռ կողմերը, ինչպիսիք են Ռուսաստանն ու Իրանը, առանձնապես չեն դիմադրում այդ նախագծին։
«Ռուսաստանը հասկանում է, որ այս ելքն իրեն պետք է՝ հաշվի առնելով արևմտյան երկրների կողմից սահմանված պատժամիջոցները։ Առնվազն երկաթուղով Թուրքիայի շուկա մուտք գործելու համար։ Այս դեպքում շատ բան կախված է Հայաստանի ղեկավարությունից, թե ինչպես այն կիրականացնի այդ նախագիծը։ Իհարկե, շատ բան կախված է նաև ամերիկացիների դիրքորոշումից, բայց ինձ թվում է, որ ամերիկյան օպերատորները, չնայած իրանական գործոնին, կցանկանան բավականին ակտիվ աշխատել նախագծի իրականացման ուղղությամբ», — պնդում է վերլուծաբանը։
Մամեդյարովը, քննարկելով Քոչարյանի շանսերը ընտրություններում, նշել է, որ դրանք շատ չեն։ Նրա խոսքով՝ հնարավոր է Քոչարյանը ինչ-որ տոկոս հավաքի և անցնի խորհրդարան, բայց դառնալ վարչապետ, նույնիսկ հնարավոր կոալիցիայի պարագայում, քիչ իրատեսական է։
«Նայեք իրավիճակին։ Քոչարյանը հրաժարվեց հանրահավաքներ հավաքելու գաղափարից, որովհետև գիտի՝ չի կարողանա մարդկանց մոբիլիզացնել։ Վերջին իրադարձությունները ցույց տվեցին, որ նույնիսկ վճարովի մասնակիցների հաշվառմամբ հանրահավաքներին եկել է 10–12 հազար մարդ։ Դա կաթիլ է ծովում։ Փաշինյանն իր ժամանակին՝ 2018 թվականին, հրապարակներում հավաքում էր ավելի քան 100 հազար մարդ, երբ հեռացնում էր Սերժ Սարգսյանին։ Հայաստանի բնակչությունը հոգնել է այդ քոչարյաններից, կարապետյաններից, սարգսյաններից և այդպես շարունակ։ Մարդիկ նրանց չեն հավատում։ Սկզբունքորեն չեն հավատում մեծ փողերին։ Այնպես որ այս դեպքում, ինձ թվում է, Փաշինյանի շանսերն ավելի շատ են», — եզրափակել է Էլմար Մամեդյարովը։
