«Ուժեղ Հայաստան» կուսակցության նախագահ Սամվել Կարապետյանը հանդիպել է թիմակիցների հետ: Հանդիպման ընթացքում կուսակցության խորհրդի անդամ Նարեկ Կարապետյանը անդրադարձել է ծայրահեղ աղքատության թեմային և համեմատել է 2018-ի աղքատության թվերը՝ 2024-ի հետ:
«Տավուշի մարզ՝ 25%-ից աղքատությունը աճել է և դարձել է 39.9%, համարյա 40%, Վայոց ձորի մարզ՝ Ջերմուկի դեպքերից հետո 18%-ից աղքատությունը աճել է և դարձել է 30%, Շիրակի մարզ՝ աղքատությունը հասել է 43%-ի: Կոտայքի մարզ՝ գների թանկացման արդյունքում 6 տարվա ընթացքում 22%-ից աղքատությունը հասել է 24%-ի, Գեղարքունիքի մարզ՝ 22%-ից գների թանկացման և Սոթքի դեպքերի արդյունքում աղքատությունը 22%-ից հասել է 27%-ի, Արմավիրի մարզ՝ գների թանկացման արդյունքում աղքատությունը 25%-ից հասել է 27%-ի:
Նույն ժամանակահատվածում հարևան երկրները երկու անգամ նվազեցրել են աղքատությունը, իսկ Հայաստանում աղքատության նվազում միայն մայրաքաղաք Երևանում և շրջակայքում է: Մենք առաջարկում ենք ստեղծել աղքատության հաղթահարման հիմնադրամ, որտեղ ներդրում են անելու պետությունը, իսկ մեծամասամբ տարբեր հիմնադրամներ ու գործարար աշխարհի մեր գործընկերները, դրա արդյունքում ծայրահեղ աղքատության մեջ գտնվող մեր հայրենակիցները, որոնք շատ դեպքերում ամբողջ ընտանիքով ստանում են պետությունից ընդամենը 20-30,000 դրամ աջակցություն, կստանան 5 հոգանոց ընտանիքի դեպքում ամսական 150,000 դրամ աջակցություն աղքատության հաղթահարման հիմնադրամից, որը թույլ կտա նրանց դուրս գալ աղքատությունից»,- նշել է Կարապետյանը:
