Մինչև մեր ծրագիրը ոչ մեկ Հայաստանում մթերման կայաններով չի զբաղվել, դրա համար մեր գյուղերը ունեն այն վիճակը, ինչ ունեն: Այս մասին ասել է «Ուժեղ Հայաստան» կուսակցության խորհրդի անդամ Նարեկ Կարապետյանը:
«Մենք այսօր Իջևանում ենք, հանդիպումներ կունենանք Իջևանում, համերգ՝ Դիլիջանում: Երեկ գնացել էինք Նոյեմբերյան և Բերդ, այցելեցինք նաև մի շարք համայնքներ, Զորական գյուղ, Չարդախլուի նախկին բնակիչների մեծ մասը տեղափոխվել էին այնտեղ, շատ տպավորիչ և պարտավորեցնող հանդիպում էր: Գնացինք նաև Բագրատաշեն, որտեղ խոսեցինք տարածաշրջանի զարգացման և այն մասին, թե ինչ ենք մենք առաջարկում, օրինակ՝ ջերմոցային տնտեսությունների համար էժան գազ:
Շատ տպավորիչ էր այցելությունը և մարդկանց վերաբերմունքը Շամշադինում, չնայած սուղ պայմաններին, մարդիկ ազգային գաղափարներով լցված էին և վստահում էին, որ մեր ազգը կարող է ունենալ մեծ փոփոխություններ և մեծ առաջադիմություն։ Նոյեմբերյանում գրեթե ամեն ինչ աճում է, բայց գյուղացիները մթերման տեղ չունեն, հանում են, ճամփեզրին են դնում, վաճառում են իրենց բերքը, չկան մթերման կայաններ: Մինչև մեր ծրագիրը ոչ մեկ Հայաստանում դրանով չի զբաղվել, այդ պատճառով էլ մեր գյուղերը ունեն այն վիճակը, ինչ ունեն»,-նշել է նա:
