2026 թվականի առաջին կիսամյակում Հայաստան է մուտք գործել 59,300-ով ավելի անձ, քան դուրս է եկել, իսկ նախորդ տարիներին այդ ցուցանիշը 10,000-15,000 է եղել։ 2026 թվականի առաջին կիսամյակի ամփոփիչ ասուլիսի ժամանակ ասել է ՆԳՆ միգրացիայի և քաղաքացիության ծառայության պետի պաշտոնակատար Նելլի Դավթյանը։
Նա նշել է, որ նախորդ տարի +8,660 սահմանահատում է եղել, այսինքն` մուտքերի թիվն այդքանով գերազանցել է ելքերի թիվը։
«Առաջին կիսամյակում ևս ՀՀ քաղաքացիների սահմանահատումների տարբերությունը դրական է։ Սա բացառիկ ցուցանիշ է, քանի որ սովորաբար այն բարելավվում է տարվա երկրորդ կիսամյակում, ինչը հիմնականում պայմանավորված է սեզոնային աշխատանքներով։ Այս տարի արձանագրվել է +1,347 թիվը որպես մուտքերի և ելքերի տարբերություն։ 871,409 ՀՀ քաղաքացի է մուտք գործել Հայաստան, և գրանցվել է 870,062 ելք։ Տարբերությունը դրական է»,- ասել է Դավթյանը։
