ՀՀԿ ԵԿ ղեկավար Հենրիխ Դանիելյանը գրում է.
Երեկ ԱԺ ամբիոնից ոմն Գարիկ Սարգսյան խոսում էր Մարտի 1-ից՝ շրջանցելով այն հանգամանքը, որ այդ իրադարձությունների օրերին իր այսօրվա քաղաքական ղեկավար Նիկոլ Փաշինյանը հրապարակային կոչերով դիմում էր ցուցարարներին՝ խոսելով մահակներով զինվելու և իրավապահների նկատմամբ ուժ կիրառելու մասին։ Պատմությունը չի կարելի ներկայացնել ընտրովի՝ հիշելով միայն այն դրվագները, որոնք տվյալ պահին քաղաքականապես հարմար են։
Ելույթի սկզբում նա շնորհավորեց ուսանողներին, իսկ հետո անցավ Սերժ Սարգսյանի կառավարման տարիների քննադատությանը։ Հենց այստեղ անհրաժեշտ է արձանագրել ամենակարևորը։
Գարիկ, Սերժ Սարգսյանի տարիների ուսանողը սովորում էր մի երկրում, որի սահմաններն ու անվտանգությունը պաշտպանված էին, իսկ Արցախում ապրում էր հայկական բնակչությունը։ Երիտասարդները մեկնում էին բանակ, վերադառնում, շարունակում կրթությունը և կառուցում իրենց ապագան հայրենիքում։ Այդ հնարավորությունն ունեցել ես նաև դու։
Դու պատմեցիր, թե ինչպես ես բանակից վերադարձել և շարունակել ուսումդ։ Իսկ ձեր իշխանության տարիներին հազարավոր երիտասարդներ, որոնցից շատերն ուսանողներ էին կամ դեռ պետք է ուսանող դառնային, պատերազմից տուն չվերադարձան։ Ձեր կառավարման արդյունքում կորսվեց ամբողջ Արցախը, իսկ արցախցի հազարավոր երիտասարդներ զրկվեցին ոչ միայն իրենց կրթական բնական միջավայրից, այլև իրենց տներից ու հայրենիքից։
Ուստի Սերժ Սարգսյանի ժամանակաշրջանի մասին ԱԺ ամբիոնից դատողություններ անելուց առաջ արժե պատասխանել մեկ պարզ, բայց քաղաքականապես շատ ծանր հարցի․ ինչպիսի՞ անվտանգային համակարգ և պետություն ստացաք 2018-ին, և ի՞նչ վիճակի հասցրեցիք այն ձեր կառավարման տարիներին։
Քաղաքականության մեջ իշխանություններին գնահատում են ոչ թե ամբիոնից հնչեցրած ելույթներով, այլ իրենց կառավարման արդյունքներով և այդ արդյունքների համար ստանձնած պատասխանատվությամբ։
Հ.Գ. Սերժ Սարգսյանի կառավարման տարիներին գոյություն ունեին երկու հայկական հանրապետություններ՝ Հայաստանի Հանրապետությունն ու Արցախի Հանրապետությունը։ Ձեր կառավարման արդյունքում Արցախն ամբողջությամբ անցավ Ադրբեջանի վերահսկողության տակ, իսկ Հայաստանի երիտասարդների ու ուսանողների մի ամբողջ սերունդ իր կյանքի ամենածանր գինը վճարեց ձեր իշխանության ընդունած որոշումների և վարած քաղաքականության հետևանքների համար։
Սա է երկու ժամանակաշրջանների միջև ամենածանր քաղաքական տարբերությունը։
