ԼՀԿ ղեկավար Էդմոն Մարուքյանը գրել է.
«Տեսա, թե ինչպես են Ազգային ժողովի նիստերի դահլիճից դիմում տիգրանաշենցիներին՝ ասելով. «Սիրելի՛ տիգրանաշենցիներ, մենք պայքարում ենք ձեր տների համար»։ Սակայն իրականում Տիգրանաշենի հարցն այդքան պարզունակ չէ։ Ցանկացած բնակավայրում էլ կգտնվեն քաղաքացիներ, որոնք պատրաստ կլինեն բարձր փոխհատուցման դիմաց լքել իրենց տները։
Տիգրանաշենի հարցը լոկ տների խնդիր չէ։ Այն աշխարհագրական և ռազմավարական նշանակություն ունի՝ առնչվելով Հայաստանի հարավի և Իրանի հետ անխափան ճանապարհային կապի պահպանմանը և, վերջապես, ՀՀ տարածքային ամբողջականությանը։ Եվ պետք չէ այսօր այդ հարցի նշանակությունը նսեմացնել՝ այն ներկայացնելով ընդամենը որպես մի քանի տան խնդիր։
ՀՀ տարածքում Ադրբեջանին պատկանող որևէ տարածք չկա, և սա էր կառավարության դիրքորոշումը երկու տարի առաջ։ Փաշինյանը պահանջում էր ներկայացնել ապացույցներ և իրավական հիմքեր, որոնք կհաստատեին, որ ՀՀ տարածքում որևէ տարածք պատկանում է Ադրբեջանին։ Եվ մինչ օրս Ադրբեջանը ոչ մի ապացույց կամ իրավական հիմք չի ներկայացրել, որովհետև դրանք պարզապես չկան»։
