Իմ տղան այդ որակի տղա չէ, թող քննությունը պարզի: Այս մասին լրագրողների հետ զրույցում ասել է նախկին վարչապետ Հովիկ Աբրահամյանը՝ պատասխանելով հարցին, թե արդյո՞ք իր որդու կողմից սպանության պատվեր է եղել:
«Քննություն է ընթանում, թող քննությունը որոշի, այն ժամանակ կիմանանք, ես աբսուրդ եմ համարում նման մեղադրանքը, քանի որ իմ որդուն ով ճանաչում է, ով շփվել է, ում հետ աշխատել է, բոլորը գիտեն, որ ինքը այդ որակի մարդ չէ»,- նշել է նա:
Հիշեցնենք, որ 2026 թվականի օգոստոսի 8-ին ձերբակալվել էր նախկին վարչապետ Հովիկ Աբրահամյանի որդին՝ Արգամ Աբրահամյանը, ով կալանավորված Գագիկ Ծառուկյանի փեսան է և եղել է Արտաշատ համայնքի նախկին ղեկավարը: Վերջինիս մեղադրում են 2023 թվականի ապրիլի 30-ին Երևան քաղաքի Մյասնիկյան պողոտայի շենքերից մեկի մուտքի մոտ կատարված Ս․Վ․-ի սպանությունը պատվիրվելու մեջ։
Ըստ ՔԿ-ի՝ պլանավորված, համակողմանի ապացուցողական ու վարութային գործողությունների արդյունքում պարզվել է, որ Ա.Ա.-ն կնոջը՝ Է.Ծ.-ին կասկածելով «Ավետարանի հավատքի քրիստոնյաներ» կրոնական կազմակերպության անդամ, հոգևոր հովիվ Ս․Վ․-ի հետ անձնական փոխհարաբերություններ ունենալու, ինչպես նաև նրան խոշոր գումարներ տալու մեջ, վրեժխնդիր լինելու շարժառիթով նպատակադրվել է կյանքից զրկել Ս․Վ․-ին, սակայն որոշել է իր հանցավոր մտադրությունն իրագործել ոչ թե անձամբ, այլ իրենից ֆինանսական և անձնական կախվածության մեջ գտնվող հավատարիմ անձի՝ իր անվտանգության աշխատակից Գ.Հ.-ի միջոցով:
